Túrkistanda «Shapaǵatshym bir ózińsiń Muhammed» taqyrybynda Máýlit merekesine arnalǵan rýhanı kesh ótti. Adamzattyń asyly sanalǵan Paıǵambardyń týǵan kúni ulyqtalǵan sharada QMDB janyndaǵy «Zeket» qorynyń «El úlesi – páterge» jobasy aıasynda 4 januıaǵa baspana kilti berildi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Keleli kezdesýde oblys ákiminiń orynbasary Ulan Tájibaev pen oblystyń bas ımamy Erkebulan Qaraqulov quttyqtaý sóz sóılep, Táýelsizdiktiń 30 jyldyǵymen quttyqtady. Sondaı-aq, teatrlandyrylǵan qoıylymdar kórsetilip, salaýat aıtyldy.

– Máýlit merekesi qutty bolsyn ardaqty áleýmet! Búginde kúlli adamzat balasy Paıǵambarymyzdaı tulǵaǵa asa muqtaj. Onyń meıirimdiligi men súıispenshiligine zárý.  Bizder eki dúnıe sardary Muhammedtiń (s.a.s) qıamet kúninde shapaǵatshy bolýyn tileýimiz kerek. Alla Taǵala elimizge tynyshtyq, otbasylaryńyzǵa amandyq bersin, – dedi Erkebulan Ybraıymuly.

Dinı jıynda teolog,  RANT múshesi Arman Qýanyshbaev sahabalardyń ǵıbratty ǵumyry týraly keńinen toqtaldy. Óz kezeginde qazaq estradasynyń jaryq juldyzdary Marat Omarov pen Sáken Maıǵazıev ánnen shashý shashyp, sahna kórkin qyzdyrdy.