Jiynǵa Bilim men ǵylymdy damytý jónindegi respýblikalyq qoǵamdyq keńestiń tóraiymy, Parlament Májilisiniń depýtaty Juldyz Súleimenova qatysyp, tóraǵalyq etti.
Jańa oqý jylyndaǵy atqarylǵan jumystarmen qatar bilim salasyndaǵy ózekti problemalar, «Nur Otan» partiiasynyń Jol kartasy aiasynda iske qosylatyn mektepterdiń qurylys barysy qozǵaldy.
Májiliste «Nur Otan» partiiasy Túrkistan oblystyq filialy tóraǵasynyń birinshi orynbasary Beisen Tájibaev óńirde fraktsiia músheleri bilim salasyndaǵy ózekti problemalardy baqylaýda ustap otyrǵanyn, jalpy bilim salasyna memleket tarapynan qamqorlyq jasalyp jatqanyn jetkizdi.
Bul oidy Túrkistan adami áleýetti damytý basqarmasynyń basshysy Raqymbek Jolaev ta jalǵastyrdy. Onyń aitýynsha, oblystaǵy 937 mektepte 528 740 oqýshy bilim alyp jatyr. 2021-2022 oqý jylyna 51427 bala birinshi synypqa qabyldanǵan.
– Barlyq oqý oryndarynda sanitarlyq normalardyń saqtalýy erekshe nazarǵa alynyp, qajetti dezinfektsiialyq qural-jabdyqtarmen qamtamasyz etilgen. Sonymen qatar, oblystaǵy barlyq bilim mekemelerinde (memlekettik, jekemenshik) «Ashyq» baǵdarlamasy ornatyldy, – degen R.Jolaev óńirde úsh aýysymdy jáne apatty mektepterdiń máselesin sheshý baǵytynda jumys júrip jatqanyn atap ótti.
Sonymen birge kolledjderdegi memlekettik tapsyrys kólemi 2 esege azaiǵanyn, bul talai jastyń tegin bilimnen qaǵylýyna aparyp soqqanyn jetkizip, halyq qalaýlysyna birqatar usynys aitty.
Kún tártibinde Túrkistan oblysynda «Nur Otan» partiiasynyń sailaýaldy baǵdarlamasy aiasynda salynyp jatqan 78 mekteptiń qurylysy jáne jańa oqý jylynda qurylysy aiaqtalmai qalǵan 6 mektep negizgi másele retinde talqylandy. Oblystyq qurylys basqarmasy basshysynyń orynbasary Egentai Tájibaev 2021 jyly óńirdegi 78 mekteptiń qurylysyna 18,9 mlrd teńge qaralǵanyn, biyl 44 bilim nysanyn el igiligine berý josparlanǵanyn jetkizdi. Biraq 1 qyrkúiekte berilýi tiis 17 jańa mekteptiń 6-aýy merziminde tapsyrylmaǵan.
Qoǵamdyq keńes músheleri jaýapty basqarma ókilinen bul túitkildiń sebebin surady jáne qyrkúiek aiynyń sońyna deiin mektepterdiń paidalanýǵa beriletini týraly ýádesin aldy. Búginde 6 mekteptiń qurylysyn keshiktirgen merdigerlerge eskertý berilgen.
Bilim men ǵylymdy damytý jónindegi respýblikalyq qoǵamdyq keńestiń tóraiymy, Parlament Májilisiniń depýtaty Juldyz Súleimenova bilim salasyndaǵy máselelerdi jasyrmai aityp, sheshý joldaryn qarastyrý kerektigin málimdedi. «Nur Otan» partiiasynyń «Ózgerister joly: Ár azamatqa laiyqty ómir!» sailaýaldy baǵdarlamasyn oryndaý jónindegi Jol kartasynynda bilim men ǵylymdy damytýǵa mán berilgenine toqtaldy.
– Elimiz úshin Túrkistan óńiriniń orny erekshe. Jol kartasyndaǵy tarmaqtardyń kópshiliginde osy oblys qamtylǵan. Óńirde 900-den astam mektep bar. Oqýshy sany jóninen de óńir respýblikada aldyńǵy qatarda tur. Sondyqtan bilim salasyna basymdyq berip, deńgeiin kóterýge kúsh salǵan jón.
Kezinde bul aimaqtan uly ǵulamalar, ǵalymdar shyqqan. Memleket tarapynan kórsetilgen qoldaýlar nátijesinde bilim sapasyn kóterip, Túrkistannan XXI ǵasyrdyń Ál-Farabiin shyǵarýymyz kerek. Ekinshiden, bir ǵana basqarma úshin myńǵa jýyq mektepti, ustazdar men oqýshylardyń jaǵdaiyn jasaý, baqylaý óte qiyn. Taǵy da qosymsha jobalyq keńese nemese basqa jolyn qarastyrý qajet shyǵar.
Bilim men ǵylymdy damytý jónindegi respýblikalyq qoǵamdyq keńestiń tóraiymy retinde men usynystar men ótinishterdi tyńdaýǵa árqashan daiynmyn. Máselen áleýmettik jeli jáne BAQ arqyly óńirdegi birqatar aýyldaǵy mektep máselesin kórip-bilip otyrmyn. Olar boiynsha ministrlikke naqty usynystar berilip, jumys júrgiziledi, – dedi Juldyz Súleimenova.
