جيىنعا ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەستىڭ ءتورايىمى، پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا قاتىسىپ، ءتوراعالىق ەتتى.
جاڭا وقۋ جىلىنداعى اتقارىلعان جۇمىستارمەن قاتار ءبىلىم سالاسىنداعى وزەكتى پروبلەمالار، «Nur Otan» پارتياسىنىڭ جول كارتاسى اياسىندا ىسكە قوسىلاتىن مەكتەپتەردىڭ قۇرىلىس بارىسى قوزعالدى.
ماجىلىستە «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆ وڭىردە فراكسيا مۇشەلەرى ءبىلىم سالاسىنداعى وزەكتى پروبلەمالاردى باقىلاۋدا ۇستاپ وتىرعانىن، جالپى ءبىلىم سالاسىنا مەملەكەت تاراپىنان قامقورلىق جاسالىپ جاتقانىن جەتكىزدى.
بۇل ويدى تۇركىستان ادامي الەۋەتتى دامىتۋ باسقارماسىنىڭ باسشىسى راقىمبەك جولايەۆ تا جالعاستىردى. ونىڭ ايتۋىنشا، وبلىستاعى 937 مەكتەپتە 528 740 وقۋشى ءبىلىم الىپ جاتىر. 2021-2022 وقۋ جىلىنا 51427 بالا ءبىرىنشى سىنىپقا قابىلدانعان.
– بارلىق وقۋ ورىندارىندا سانيتارلىق نورمالاردىڭ ساقتالۋى ەرەكشە نازارعا الىنىپ، قاجەتتى دەزينفەكسيالىق قۇرال-جابدىقتارمەن قامتاماسىز ەتىلگەن. سونىمەن قاتار، وبلىستاعى بارلىق ءبىلىم مەكەمەلەرىندە (مەملەكەتتىك، جەكەمەنشىك) «Ashyq» باعدارلاماسى ورناتىلدى، – دەگەن ر.جولايەۆ وڭىردە ءۇش اۋىسىمدى جانە اپاتتى مەكتەپتەردىڭ ماسەلەسىن شەشۋ باعىتىندا جۇمىس ءجۇرىپ جاتقانىن اتاپ ءوتتى.
سونىمەن بىرگە كوللەدجدەردەگى مەملەكەتتىك تاپسىرىس كولەمى 2 ەسەگە ازايعانىن، بۇل تالاي جاستىڭ تەگىن بىلىمنەن قاعىلۋىنا اپارىپ سوققانىن جەتكىزىپ، حالىق قالاۋلىسىنا ءبىرقاتار ۇسىنىس ايتتى.
كۇن تارتىبىندە تۇركىستان وبلىسىندا «Nur Otan» پارتياسىنىڭ سايلاۋالدى باعدارلاماسى اياسىندا سالىنىپ جاتقان 78 مەكتەپتىڭ قۇرىلىسى جانە جاڭا وقۋ جىلىندا قۇرىلىسى اياقتالماي قالعان 6 مەكتەپ نەگىزگى ماسەلە رەتىندە تالقىلاندى. وبلىستىق قۇرىلىس باسقارماسى باسشىسىنىڭ ورىنباسارى ەگەنتاي تاجىبايەۆ 2021 جىلى وڭىردەگى 78 مەكتەپتىڭ قۇرىلىسىنا 18،9 ملرد تەڭگە قارالعانىن، بيىل 44 ءبىلىم نىسانىن ەل يگىلىگىنە بەرۋ جوسپارلانعانىن جەتكىزدى. ءبىراق 1 قىركۇيەكتە بەرىلۋى ءتيىس 17 جاڭا مەكتەپتىڭ 6-اۋى مەرزىمىندە تاپسىرىلماعان.
قوعامدىق كەڭەس مۇشەلەرى جاۋاپتى باسقارما وكىلىنەن بۇل تۇيتكىلدىڭ سەبەبىن سۇرادى جانە قىركۇيەك ايىنىڭ سوڭىنا دەيىن مەكتەپتەردىڭ پايدالانۋعا بەرىلەتىنى تۋرالى ۋادەسىن الدى. بۇگىندە 6 مەكتەپتىڭ قۇرىلىسىن كەشىكتىرگەن مەردىگەرلەرگە ەسكەرتۋ بەرىلگەن.
ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەستىڭ ءتورايىمى، پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا ءبىلىم سالاسىنداعى ماسەلەلەردى جاسىرماي ايتىپ، شەشۋ جولدارىن قاراستىرۋ كەرەكتىگىن مالىمدەدى. «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن ورىنداۋ جونىندەگى جول كارتاسىنىندا ءبىلىم مەن عىلىمدى دامىتۋعا ءمان بەرىلگەنىنە توقتالدى.
– ەلىمىز ءۇشىن تۇركىستان ءوڭىرىنىڭ ورنى ەرەكشە. جول كارتاسىنداعى تارماقتاردىڭ كوپشىلىگىندە وسى وبلىس قامتىلعان. وڭىردە 900-دەن استام مەكتەپ بار. وقۋشى سانى جونىنەن دە ءوڭىر رەسپۋبليكادا الدىڭعى قاتاردا تۇر. سوندىقتان ءبىلىم سالاسىنا باسىمدىق بەرىپ، دەڭگەيىن كوتەرۋگە كۇش سالعان ءجون.
كەزىندە بۇل ايماقتان ۇلى عۇلامالار، عالىمدار شىققان. مەملەكەت تاراپىنان كورسەتىلگەن قولداۋلار ناتيجەسىندە ءبىلىم ساپاسىن كوتەرىپ، تۇركىستاننان XXI عاسىردىڭ ءال-فارابيىن شىعارۋىمىز كەرەك. ەكىنشىدەن، ءبىر عانا باسقارما ءۇشىن مىڭعا جۋىق مەكتەپتى، ۇستازدار مەن وقۋشىلاردىڭ جاعدايىن جاساۋ، باقىلاۋ وتە قيىن. تاعى دا قوسىمشا جوبالىق كەڭەسە نەمەسە باسقا جولىن قاراستىرۋ قاجەت شىعار.
ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەستىڭ ءتورايىمى رەتىندە مەن ۇسىنىستار مەن وتىنىشتەردى تىڭداۋعا ءارقاشان دايىنمىن. ماسەلەن الەۋمەتتىك جەلى جانە ب ا ق ارقىلى وڭىردەگى ءبىرقاتار اۋىلداعى مەكتەپ ماسەلەسىن كورىپ-بىلىپ وتىرمىن. ولار بويىنشا مينيسترلىككە ناقتى ۇسىنىستار بەرىلىپ، جۇمىس جۇرگىزىلەدى، – دەدى جۇلدىز سۇلەيمەنوۆا.
