Memleket basshysy týrizmdi damytýdy ár kez saiyn alǵa tartyp keledi. Túrkistan oblysy sol bastamada basty ról atqarady dep sanalǵan. Alaida naqty jaǵdai tapsyrmanyń qaǵaz júzinde qalyp, is júzinde aiaqtalmaǵan joba, bos jaǵajai, kútimsiz infraqurylymdar beleń alyp otyrǵanyn óńir tilshisi Qojahmet Keńesbaev video dáleldermen sipattap, másele kóteredi, dep habarlaidy Dalanews.kz.
Telegram-daǵy Prezidentke hat arnasyna joldanyp, kóterilgen ózekti másele Ómirzaq Shókeevten keiingi Túrkistan oblysyndaǵy tastaýly týristik nysandardyń búgingi jai-kúiin sipattaidy. Máselen, 7 mlrd teńgeden astam aqsha bólinip, tolyǵymen iske qosylmaǵan jaǵajaidyń ózi 2022 jyly bir maýsym jumys istep, odan keiin qaraýsyz qalǵan.
"Jaǵajai qalanyń balansyna ótpegen. Qazirgi ýaqytta osy másele sheshimi qarastyrylyp jatyr. Jeke investor taptyq. Endi ol óz jobasyn ákimdikke ótkizýi tiis, sóitip ary qarai bul rette jumystar júredi. Jaǵadai qaitadan 1-1,5 jylda qoldanysqa berilip qalady", - deidi Túrkistan qalasynyń ákimi Ázimbek Pazylbekuly.
Tilshiniń aitýynsha, jaǵajaiǵa aýyq-aýyq bólingen qarajattyń esebi joq, iaǵni bólingen aqsha kóp, nátije joq, al jaýaptysy anyqtalmaǵan. Merdiger kompaniiaǵa bar bolǵany 1 mlrd teńge aiyppul salynyp, jaǵdai sol kúii qalǵan. Qazir oblystyq ekonomikalyq tergeý departamenti tekserý júrgizip jatqan kórinedi.
Sondai-aq tilshi Ómirzaq Shókeev ákim bolyp turǵanda óńirde ǵasyrdan astam sý munarasy da taǵy bir týristik nysan retinde ashylǵanyn aitady. Qazir onyń da esiginde qara qulyp tur. Qanshama qarajat jumsalǵan bul týristik nysan búginderi nege iske asqysyz bolyp qalǵany da beimálim.
"Biz ony senimgerlik basqarýǵa bergenbiz. Olar jumysty júrgize almady. Endi ony basqa kásipkerge berip, alda qoldaný úshin tiisti jumystar atqarylady", - deidi qala ákimi bul rette.
Týristik jobalardyń osyndai kúiine qarap-aq Prezident tapsyrmasyna júrdim-bardym qaraýshylyq basym ekenin aitpasa da ańǵarýǵa bolatyn sekildi.
