Un ónimderiniń 15 túrin daıyndaıtyn zaýyt 2016 jyldyń aqpan aıynda iske qosylǵan. Jobanyń quny – 200 mln. teńgeni quraıdy. Zaýyt byltyr 287654 myń teńgeniń ónimin óndirgen. Sondaı-aq bul zaýytta et ónimderinen shujyqtyń 8 túri óndiriledi. Ol úshin zaýyt arnaıy mal bordaqylaıtyn alańyn qurypty.
– Qazirgi tańda zaýyt toqtaýsyz jumys istep tur. Ónimderimizge suranys mol. Negizinen Túrkistan qalasy men kórshi Qyzylorda oblysynyń birqatar aýdandaryn un ónimderimen qamtyp otyrmyz, – dedi «Iassy nan» JSHS-niń bas dırektory Nasıba Ataeva.
Munan soń oblys ákimi Túrkistan qalasyna qarasty Shaǵa aýyldyq okrýgindegi jyl basynda iske qosylǵan «Erasyl» sharýa qojalyǵynyń jylyjaıynda boldy. Erǵalı Joldasbekov basshylyq jasaıtyn jylyjaı kólemi 0,35 gektardy quraıdy. Koreıalyq qurylǵymen jabdyqtalǵan jylyjaıdyń smetalyq quny 70 mln. teńge. Búginde munda egilgen qıardan 36 tonna jınalyp otyr. Negizgi qýattylyqqa jetken kezde bul jylyjaıdan gektaryna 150 tonna ónim alýǵa bolady.
Aıta keteıik, búginde Túrkistan qalasynda jylyjaılardyń jalpy kólemi 50,6 gektardy quraıdy. Onyń ishinde ónerkásiptik jylyjaılar 10,5 gektar. 2016 jyly jylyjaılardan kóktemgi jáne kúzgi aýysymda orta eseppen 1040 tonna qyzanaq, 1130 tonna qıar, 90 tonna basqa da kókónister, 200 myń dana gúl, barlyǵy 2260 tonna kókónis óndirilgen. Qazirgi tańda jergilikti jerdegi jylyjaılarda óndirilgen qyzanaqpen qala turǵyndary 45, qıarmen 67 paıyzǵa qamtamasyz etilýde.
Oblys basshysy Túrkistan qalasyna qarasty Oranǵaı aýylyndaǵy Áripjan Syzdyqovtyń «Iassy qus» sharýa qojalyǵyna da atbasyn burdy. Sońǵy úlgidegi tehnologıalarmen jabdyqtalǵan qus sharýashylyǵy negizinen taýyq eti men jumyrtqa óndiredi. Jobanyń birinshi kezeńi 2016 jyly iske qosylyp, 12 myń bas etti baǵyttaǵy jáne 22 myń bas jumyrtqa baǵyttaǵy taýyq ósirilýde. 2016 jyly jalpy 4,4 mln. dana jumyrtqa óndirilip, qala boıynsha óndiriletin jumyrtqanyń 30,4 paıyzyn qurady. Jobanyń ekinshi kezeńi 2017 jyldyń ekinshi jartyjyldyǵynda paıdalanýǵa beriledi. Jobanyń quny 312 mln teńgeni qurap, qosymsha 22 myń jumyrtqa baǵyttaǵy taýyq ósirilip, jyl sońyna deıin 90 tonna taýyq eti jáne 10,8 mln. dana jumyrtqa óndirilmek.
– Túrkistan qalasynda atqarylyp jatqan jumystar az emes. Desek te, kásipkerlik nysandardyń qataryn arttyryp, jumyssyzdyqty azaıtý máseleleri nazardan tys qalmaýy tıis. Aýdan basshylarynyń jumysy sonda ǵana nátıjeli bolady, – dedi Janseıit Qanseıituly.
Eger joba tolyq iske asyrylsa, fabrıka ónimderi Túrkistan qalasyna syrttan keletin taýyq etteriniń ornyn almastyrmaq.
OQO ákiminiń baspasóz qyzmeti
