Túrkistan qalasynda zaman talabyna sai jańa «A.B.L.» fitnes ortalyǵy ashyldy. Qýanyshty sátke oblys ákimi Nuralhan Kósherov qatysyp, jurtshylyqty quttyqtady.
– Túrkistan – tek rýhani astana ǵana emes, sonymen qatar sport ortalyǵyna ainalyp kele jatqan óńir. Memleket basshysy Qasym-Jomart Toqaevtyń buqaralyq sportty damytý jónindegi tapsyrmasyna sáikes, óńirimizde sport infraqurylymynyń halyqqa qoljetimdiligin arttyrý baǵytynda naqty jumystar atqarylýda. Máselen, byltyr jalpy quny 73 sport nysanynyń qurylysy aiaqtalsa, al biyl 54 sport nysanyn paidalanýǵa berý josparlanyp otyr. Olardyń qatarynda elimizde teńdesi joq eki iri joba – ippodrom men eskek esý kanaly bar. Bul – sportty damytýǵa jáne ult densaýlyǵyn nyǵaitýǵa baǵyttalǵan memleketimizdiń berik ustanymynyń aiqyn kórinisi.
Biz tek sporttyq nysandardy salyp qana qoimai, olardyń tiimdi jumys isteýine jáne turǵyndar úshin qoljetimdi bolýyna erekshe mán berip kelemiz. Bul keshen – Túrkistan qalasy turǵyndarynyń densaýlyǵyn nyǵaityp, jastardyń sportqa degen qyzyǵýshylyǵyn arttyratyn mańyzdy orynǵa ainalatynyna senimdimin, – degen oblys ákimi qala turǵyndaryn salaýatty ómir saltyn ustanýǵa, sportpen júieli túrde ainalysýǵa shaqyrdy.
Zamanaýi talaptarǵa sai salynǵan fitnes ortalyǵynda sportpen shuǵyldanýǵa, salamatty ómir saltyn ustanýǵa barlyq jaǵdai jasalǵan. Jattyǵý zaldary, voleibol jáne jekpe-jek zaly bar. Sonymen birge bassein jáne ózge de dene shynyqtyrýǵa qajetti qurylǵylarmen, bólmelermen qamtylǵan.
