Túrkistan óńirinde qurylys qarqyny báseńdegen emes. Ásirese, oblys ortalyǵynda jumys qarqyndy. Halyq sanynyń ósýine bailanysty jáne týristik ortalyqqa ainaldyrý baǵytynda taǵy da mańyzdy jobalar júzege asady. Atalǵan jobalar oblys ákimdiginde ótken kezekti májiliste talqylandy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysynyń ákimi Darhan Satybaldy qalany Bas josparǵa sai damytyp, biryńǵai sáýlet úlgisin qoldaný kerektigin jetkizdi. Kógaldandyrý, aǵashtardy kóbeitý jáne bos jatqan jerdi tiimdi ári sapaly igerýdi tapsyrdy.
– Túrkistannyń ózindik dizainy, sáýlet úlgisi bolýy kerek ekenin bilesizder. Ár jobany jiti zerdelep, sáýletshilerdiń talqysynan keiin ǵana júzege asyrý kerek. Áleýmettik nysandar, demalys oryndary, saiabaqtar jáne ózge de ǵimarattar bir-birimen úilesip turǵany jón, – dedi Darhan Satybaldy.
Óńirdiń sáýleti talqylanǵan jinalysta 17 joba qaraldy. Qalalyq mádeniet úiiniń qasbeti, qalaǵa kireberis tustaǵy turǵyn úiler, abattandyrý jobalary da saralandy. Sonymen birge eskek esý kanalynyń mańyn iri týristik ortalyqqa ainaldyrý, akvapark, qonaq úiler salý máselesi talqyǵa tústi. IT park salý, qosymsha bilim berý ortalyqtary ǵimarattaryn salý týraly da usynystar qaraldy. Jobalardy júzege asyrýǵa jeke investitsiialar da tartylady.
