«Farab» kitaphanasynda ótken saltanatty jiynda LED ekran arqyly Elbasy Nursultan Nazarbaevtyń «Eldiktiń jeti tuǵyry» atty qaǵidaty týraly derekti týyndy kórsetildi. Túrkistan oblysy ákiminiń orynbasary Rashid Aiýpov jurtshylyqty merekemen quttyqtady.
– Biyl Táýelsizdik alǵanymyzǵa 30 jyl tolyp otyr. Memleketimizdi damytýda Elbasymyzdyń eńbegi eren. Qasymyzda alpaýyt derjavalar tur. Solarmen kelisip elimizdiń shekarasyn bekitý degen úlken jumys. Táýelsizdiktiń arqasynda tilimiz, dinimiz, mádenietimiz tuǵyryna qondy. Táýelsizdikti jariialaýmen másele sheshilmeidi. Ony saqtaý qajet. Álemde 5 myńdai til, iaǵni, 5 myń ult bar. Solardyń nebári 200-den astamynda ǵana memeket bar. Sondyqtan turaqtylyqty saqtaýda, eldiń qaýipsizdigin qamtamasyz etýdegi Elbasy eńbegi aitylýy tiis. Tuńǵysh Prezidenttiń tikelei qoldaýymen Túrkistanymyz qalai ózgergenin qoǵam kórip-bilip otyr, – degen ol eńbegimen daralanǵan bir top azamatty Túrkistan oblysy ákiminiń alǵyshatymen marapattady. Olardyń arasynda meditsina, memlekettik qyzmet, quqyq qorǵaý, sport, kásipkerlik jáne ózge de salalardyń ókilderi bar.
Jiynda Túrkistan oblystyq aqsaqaldar alqasynyń tóraǵasy Jarylqasyn Áziretbergenov quttyqtaý sóz sóilep, Elbasynyń táýelsizdigimizdi nyǵaitý baǵytyndaǵy eńbekteri týraly baiandady. Kentaý qalasyndaǵy №16 Iu.Gagarin atyndaǵy mektebiniń aǵylshyn tili muǵalimi Elena Strebkova da bul kúnniń mańyzdylyǵyna toqtalyp, memlekettik til eldi biriktirýshi kúsh ekenin atap ótti.
Merekelik is-sharada Túrkistan oblysynyń tanymal ánshileri men óner ujymdary kontserttik baǵdarlamasyn usynyp, otanshyldyqty dáripteitin ánder shyrqaldy.
