Túrkistan oblysynda asa mańyzdy ári eldiń ekonomıkasyn kóteretin jobalar júzege asyrylyp jatyr. Olardyń qazirgi jaı-kúıi qandaı? Qandaı máseleleri bar? Óńirlik ınvestısıalyq shtabtyń kezekti májilisinde osy túıtkilder tarqatyldy. Jıyndy oblys ákiminiń orynbasary Nuralhan Kósherov júrgizip, jobalardyń jaǵdaıymen tanystyrdy. Túrkistan oblysynyń ákimi Darhan Satybaldy árbir ınvestordyń pikirin, usynysyn tyńdap, jaýaptylarǵa tıisti tapsyrmalar berdi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
– Aýdan, qala ákimderi men basqarma basshylary ınvestısıa tartý baǵytynda belsendilikti arttyrsyn. İzdenińizder. Investısıa tartý, óndiris jáne jumys oryndaryn ashý – basty mindetimiz. Jumysty kúsheıtińizder. Kásipkerlermen, ınvestorlarmen aqyldasyńyzdar. Ekinshiden, jerdi alyp, jumysyn ýaqtyly bastamaǵan ınvestorlarǵa da zań sheńberinde shara kórilsin. Jer berilgen soń jobalar óz ýaqytynda júzege asýy kerek, – dedi Darhan Satybaldy.
Investısıalyq shtab otyrysynda 14 jobanyń jaı-kúıi talqylandy. Sol jobalar júzege asatyn aımaqtyń ákimderi men ınvestorlardyń esepteri, usynystary tyńdaldy.
Túrkistan oblysynda dron shyǵaratyn, ıntegrasıalanǵan jylytý júıelerine arnalǵan jabdyqtar óndiretin zaýyttar salý jumysy júrýde. Ósimdik maıyn shyǵaratyn zaýyt salý jobasy da usynylǵan. Bul jobalar Saýran aýdany men Arys qalasynda júzege asady.
Sonymen birge Kentaý men Túrkistanda gaz qazandyqtary men turmystyq tehnıka óndiretin zaýyt qurylysy da júrgizilmek. Jobanyń 1-kezeńi boıynsha «Kentaý» arnaıy-ekonomıkalyq aýmaǵyndaǵy burynǵy ekskavator zaýytynyń qoldanystaǵy ǵımaratyna kúrdeli jóndeý júrgizilýde. 2-kezeńiń iske asyrý boıynsha «TURAN» arnaıy-ekonomıkalyq aýmaǵynan 4 ga jer bólý kózdelip otyr.
Saıram aýdanyndaǵy «PGÝ Týrkestan» JSHS-niń bý-gaz qondyrǵysynyń qurylys barysy men «Kazahstanskıe komýnalnye setı» JSHS-niń gaz týrbınaly elektr stansıasyn salý jáne jel elektr stansıasyn salý jobalary da talqylandy. Jobany ýaqtyly aıaqtaý qajettigi eskertildi.
Túlkibas aýdanyndaǵy «Beibars-Bottlers» JSHS-niń aýyz sý jáne túrli-tústi sýsyndar óndirý zaýytynyń qurylysy aıaqtalǵan. Qazirgi tańda qural-jabdyqtaryna shef-montajdaý jumystary júrgizilip, jobany iske qosýǵa qajetti elektr energıasy máselesin sheshý kútilip otyr. Maqtaaraldaǵy «GLOBAL TEXTILE TURKESTAN» JSHS-niń toqyma klasterin qurý jobasyn iske asyrý barysy da zerdelendi. Búginde atalǵan kompanıanyń kómegimen joǵary surypty maqta egilgen, túsim oıdaǵydaı.
Májiliste osy jáne ózge de jobalar talqylanyp, jaýaptylarǵa tıisti tapsyrmaler berildi. Túrkistan oblysynda zaýyttar salý, óndiris oryndaryn ashý jumystary jalǵasady.
