Túrkistanda Asanbai Asqarovtyń 100 jyldyǵyna arnalǵan konferentsiia ótti
Búgin Túrkistan qalasyndaǵy «Uly Dala eli» ortalyǵynda Túrkistan oblysy ákimdiginiń uiymdastyrýymen kórnekti memleket jáne qoǵam qairatkeri Asanbai Asqarovtyń 100 jyldyǵy aiasynda «Elim degen er Asanbai» tanymdyq konferentsiiasy ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Basqosýǵa Almaty, Shymkent qalalary men Jambyl oblysynan Asanbai Asqarovpen qyzmettes bolǵan túrli salanyń ardagerleri, qoǵam qairatkerleri, ǵalymdar, týystary, óńirdiń azamattary men belsendi jastar qatysty. Aldymen qonaqtar uly tulǵanyń 100 jyldyǵyna arnalǵan «Uly turan perzenti» atty kórmeni tamashalady.
El rýhaniiaty úshin mańyzdy jiyndy oblystyq ardagerler keńesiniń tóraǵasy Jeńisbek Máýlenqulov júrgizip otyrdy. Konferentsiiany Túrkistan oblysy ákiminiń orynbasary Sáken Qalqamanov ashyp berdi.
– Barlyqtaryńyzdy eldiń ótkeni men erteńin bailanystyryp, tarihqa boilaityn jiynnyń ashylýymen quttyqtaimyn. Biz búgin kórnekti memleket jáne qoǵam qairatkeri, tarihi tulǵa Asanbai Asqarovtyń ónegesi men ómirine arnalǵan tanymdyq konferentsiiada bas qosyp otyrmyz. Búgingi jiynda eldik, ulttyq múddeni alǵa qoiǵan Asanbai aǵamyzdyń eńbekterin el arasyna keńinen nasihattaý baǵytynda utymdy usynystar, pikirler aitylady dep senemin, – dedi Sáken Amangeldiuly.
Sodan soń beligili jazýshy, aýdarmashy birneshe tanymdyq kitaptyń avtory Muhtar Qazybek «Asanbai Asqarov – ultymyz ulyqtaityn tulǵa» taqyrybynda baiandama jasap, tulǵanyń ómiri men eńbek joly týraly tyń derekter men erekshe qyrlaryn ashyp, estelikter aitty.
– 1978 jyly sáýir aiynda A.Asqarov Ońtústik Qazaqstan oblystyq partiia komitetiniń birinshi hatshysy bolyp aýysty, bul qyzmette 1985 jylǵy maýsym aiyna deiin istedi. Asanbai Asqarovtyń Ońtústik Qazaqstan oblysyn basqarǵan jyldary da óte jemisti boldy, óńirdi qaita túrlendirdi, jańǵyrtty, buryn-sońdy eshkim qolǵa ala almaǵan jobalardy iske asyrdy. Shymkenttiń shyraiyn keltirdi, qaladaǵy iri óndiris oryndaryn jańǵyrtyp, qazaq jastarynyń, qazaq kadrlarynyń ósýine barynsha múmkindik jasady. Dendrosaiabaq, zoopark, atshabar, balalar temir jolyn saldyryp, demalys aimaǵyn erekshe damytty, – dedi ol óz baiandamasynda.
Ári qarai konferentsiia jaryssózge ulasty. Munda birneshe aýdanǵa basshy bolǵan, eńbek ardageri, el igiligi jolynda aianbai ter tókken Ismat Tursynqulov, sol kezde Sozaq aýdanyna basshy bolyp, óńirdiń órkendeýine úles qosqan eńbek ardageri Dosybai Sherimqulov, Jambyl oblysynan kelgen jazýshy dramatýrg, «Jambyl oblysynyń Qurmetti azamaty» Álimjan Elen men ózge de azamattar tulǵa týraly oilaryn aitty. Oblystyq máslihat hatshysy Qairat Balabiev pen «AMANAT» partiiasy Túrkistan oblystyq filialynyń atqarýshy hatshysy Beisen Tájibaev ta konferentsiia tórinen tabyldy.
Memleket jáne qoǵam qairatkeri Asanbai Asqarovtyń tulǵasyn ashý, eńbegin nasihattaý barysyndaǵy pikirler, usynystar eskerilip, bul baǵyttaǵy jumystar júieli túrde jalǵasady.
