باسقوسۋعا الماتى، شىمكەنت قالالارى مەن جامبىل وبلىسىنان اسانباي اسقاروۆپەن قىزمەتتەس بولعان ءتۇرلى سالانىڭ ارداگەرلەرى، قوعام قايراتكەرلەرى، عالىمدار، تۋىستارى، ءوڭىردىڭ ازاماتتارى مەن بەلسەندى جاستار قاتىستى. الدىمەن قوناقتار ۇلى تۇلعانىڭ 100 جىلدىعىنا ارنالعان «ۇلى تۇران پەرزەنتى» اتتى كورمەنى تاماشالادى.
ەل رۋحانياتى ءۇشىن ماڭىزدى جيىندى وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ جۇرگىزىپ وتىردى. كونفەرەنسيانى تۇركىستان وبلىسى اكىمىنىڭ ورىنباسارى ساكەن قالقامانوۆ اشىپ بەردى.
– بارلىقتارىڭىزدى ەلدىڭ وتكەنى مەن ەرتەڭىن بايلانىستىرىپ، تاريحقا بويلايتىن جيىننىڭ اشىلۋىمەن قۇتتىقتايمىن. ءبىز بۇگىن كورنەكتى مەملەكەت جانە قوعام قايراتكەرى، تاريحي تۇلعا اسانباي اسقاروۆتىڭ ونەگەسى مەن ومىرىنە ارنالعان تانىمدىق كونفەرەنسيادا باس قوسىپ وتىرمىز. بۇگىنگى جيىندا ەلدىك، ۇلتتىق مۇددەنى العا قويعان اسانباي اعامىزدىڭ ەڭبەكتەرىن ەل اراسىنا كەڭىنەن ناسيحاتتاۋ باعىتىندا ۇتىمدى ۇسىنىستار، پىكىرلەر ايتىلادى دەپ سەنەمىن، – دەدى ساكەن امانگەلدى ۇلى.
سودان سوڭ بەلىگىلى جازۋشى، اۋدارماشى بىرنەشە تانىمدىق كىتاپتىڭ اۆتورى مۇحتار قازىبەك «اسانباي اسقاروۆ – ۇلتىمىز ۇلىقتايتىن تۇلعا» تاقىرىبىندا بايانداما جاساپ، تۇلعانىڭ ءومىرى مەن ەڭبەك جولى تۋرالى تىڭ دەرەكتەر مەن ەرەكشە قىرلارىن اشىپ، ەستەلىكتەر ايتتى.
– 1978 جىلى ءساۋىر ايىندا ا.اسقاروۆ وڭتۇستىك قازاقستان وبلىستىق پارتيا كوميتەتىنىڭ ءبىرىنشى حاتشىسى بولىپ اۋىستى، بۇل قىزمەتتە 1985 جىلعى ماۋسىم ايىنا دەيىن ىستەدى. اسانباي اسقاروۆتىڭ وڭتۇستىك قازاقستان وبلىسىن باسقارعان جىلدارى دا وتە جەمىستى بولدى، ءوڭىردى قايتا تۇرلەندىردى، جاڭعىرتتى، بۇرىن-سوڭدى ەشكىم قولعا الا الماعان جوبالاردى ىسكە اسىردى. شىمكەنتتىڭ شىرايىن كەلتىردى، قالاداعى ءىرى ءوندىرىس ورىندارىن جاڭعىرتىپ، قازاق جاستارىنىڭ، قازاق كادرلارىنىڭ وسۋىنە بارىنشا مۇمكىندىك جاسادى. دەندروساياباق، زووپارك، اتشابار، بالالار تەمىر جولىن سالدىرىپ، دەمالىس ايماعىن ەرەكشە دامىتتى، – دەدى ول ءوز بايانداماسىندا.
ءارى قاراي كونفەرەنسيا جارىسسوزگە ۇلاستى. مۇندا بىرنەشە اۋدانعا باسشى بولعان، ەڭبەك ارداگەرى، ەل يگىلىگى جولىندا ايانباي تەر توككەن يسمات تۇرسىنقۇلوۆ، سول كەزدە سوزاق اۋدانىنا باسشى بولىپ، ءوڭىردىڭ وركەندەۋىنە ۇلەس قوسقان ەڭبەك ارداگەرى دوسىباي شەرىمقۇلوۆ، جامبىل وبلىسىنان كەلگەن جازۋشى دراماتۋرگ، «جامبىل وبلىسىنىڭ قۇرمەتتى ازاماتى» ءالىمجان ەلەن مەن وزگە دە ازاماتتار تۇلعا تۋرالى ويلارىن ايتتى. وبلىستىق ءماسليحات حاتشىسى قايرات بالابييەۆ پەن «AMANAT» پارتياسى تۇركىستان وبلىستىق فيليالىنىڭ اتقارۋشى حاتشىسى بەيسەن تاجىبايەۆ تا كونفەرەنسيا تورىنەن تابىلدى.
مەملەكەت جانە قوعام قايراتكەرى اسانباي اسقاروۆتىڭ تۇلعاسىن اشۋ، ەڭبەگىن ناسيحاتتاۋ بارىسىنداعى پىكىرلەر، ۇسىنىستار ەسكەرىلىپ، بۇل باعىتتاعى جۇمىستار جۇيەلى تۇردە جالعاسادى.
