Túrkistanda alǵash ret erekshe qajettiligi bar azamattar arasynda «Tez Tap» intellektýaldyq saiysy ótti. Qalalyq «Jumyspen qamtý jáne áleýmettik baǵdarlamalar bóliminiń» uiymdastyrýymen ótken saiysta túrkistandyq jáne Kentaý qalasynan kelgen 60-tan asa qatysýshy baq synady, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Bilim men tapqyrlyqty talap etetin sharaǵa qalalyq «Jumyspen qamtý jáne áleýmettik baǵdarlamalar bóliminiń» basshysy Elmira Beisenova, qalalyq ardagerler keńesiniń tóraǵasy Jarqynbek Qulbaiymbetov, qalalyq áielder keńesiniń tóraiymy Uljalǵas Mustafaeva, qalalyq máslihat depýtaty Jámila Súleimenova qatysty.
– Negizinde 2 jyl buryn osy joba týraly ideia kelgen. Ony júzege asyrýdyń sáti búgin túsip tur eken. Osy saiys arqyly bir-birińizben etene tanysyp, bir sát kóńil sergitseńizder, biz úshin úlken qýanysh – osy. Jarysqa qatysýǵa qyzyǵýshylyq tanytqandaryńyzǵa alǵysym sheksiz, sáttilik tileimin, – dedi qalalyq «Jumyspen qamtý jáne áleýmettik baǵdarlamalar» bóliminiń basshysy Elmira Tuńǵyshbaiqyzy.
Tórt kezeńnen turatyn saiysqa 18 ben 50 jas aralyǵyndaǵy azamattar qatysyp, túrli taqyryptaǵy arnaiy daiyndalǵan suraqtarǵa jaýap berdi. Oi ushqyrlyǵyn tarazylaǵan jobada qatysýshylar 10 topqa bólinip, óz bilimderin ortaǵa saldy.
Saiys qorytyndysymen alǵashqy oryndy «Dostar» toby ielenip, II oryn «Jiger», III oryn «Bilimdiler» tobyna buiyrdy. Bul saiystan eshbir jan marapatsyz qaitpady. Jeńimpazdar men júldegerlerge, sonymen qatar barsha qatysýshylarǵa baǵaly syilyqtar tabystaldy.
Júzden júirikter anyqtalǵan saiysta I oryndy ielengen «Dostar» tobynyń múshesi, túrkistandyq Súienish Erkinov – 100-den asa kitap oqyǵan, bilikti jan. Shahardaǵy «Farab» ámbebap ǵylymi kitaphanasynyń úzdik oqyrmany.
– Arnaiy mektepte bilim aldym. Jasóspirim shaqtan óleń-jyrǵa janym qumartyp, kitap oqyǵandy jaqsy kórdim. Sol bilim arqyly búgingi saiysta komandamdy alǵa tartýǵa tyrystym. Túigen-bilgenderimniń jeńiske jetýge kóp kómegi tidi. Osyndai joǵary deńgeidegi jobany biz úshin uiymdastyryp, úlken múmkindik syilaǵandaryńyzǵa alǵysymdy aitamyn dedi, – joba jeńimpazy Súienish Erjanuly.
