Búgin Túrkistanda Álemniń halyqaralyq qolóner qalalary uiymy (WCC International) prezidenti Saad ál-Qaddými bastaǵan álemge tanymal qolóner ókilderi men qolóner sarapshylary bas qosty, dep habarlaidy Dalanews.kz.
Keleli basqosýǵa 19 eldiń 30-ǵa jýyq eldiń qolónershileri qatysty. Qala ákimi Nurbol Turashbekovtiń bastamasymen uiymdastyrylǵan jiynnyń maqsaty – kieli shaharǵa Halyqaralyq qolónershiler qalasy mártebesin berý.
Búginde Túrkistanda quramynda 115 múshesi bar «Turkistan Qol oner odaǵy» qoǵamdyq birlestigi jumys jasaidy. Qolónershilerdi qoldaý maqsatynda oblys ortalyǵynda «Qolónershiler qalashyǵy» týristik kesheni salynýda. Atalǵan ortalyqta arnaiy kórme zaly, shoýrým bólmeleri saialy baq, shyǵys bazary, meiramhanalar, qonaq úi, avtoturaǵy bar alyp ortalyqqa ainalady dep kútilýde. Keshenniń jalpy alańy – 2,56 gektardy quraidy. Qurylys jumystaryn jyl sońyna deiin aiaqtaý josparlanýda.
Kelgen qonaqtar aralaýdy Oqýshylar saraiynan bastap, jas qolónershileriniń jumysymen tanysty. Babalar murasyn jalǵastyrý maqsatynda Túrkistan qalasynyń balalar qolóner mektebinde 475 oqýshy sheberlik syryn meńgerip, ónerlerin shyńdaýda. «Sheber jáne shákirt» baǵdarlamasy aiasynda jas sheberlerdiń qolóner salasyndaǵy daǵdylaryn damytýǵa tájirbieli qolóner sheberleri óz úlesterin qosyp keledi.
Sheberler sondai-aq, Q.A Iasaýi kesenesinde bolyp, tarihi jádigerdi aralady. Kesene qurylysynyń tarihyna úńilip, sáýletin tamashalady. «Turkistan Qol oner odaǵy» qoǵamdyq birlestiginiń sheberleri etno-aýyl kesheninde qolóner týyndylarynyń kórmesin usyndy.
Qala ákiminiń orynbasary Talǵat Tólegenov qonaqtarǵa Túrkistannyń týristik áleýeti men múmkindikterin baiandap, kórsetkishterimen tanystyrdy.
2023 jyly qolóner salasyndaǵy zertteý jumystaryn júrgizip, jergilikti qolónershilerdiń tájiribelerimen almasý maqsatynda Túrkistan qalasy ákimdiginiń uiymdastyrýymen Birlestik múshelerinen quralǵan dellegatsiia Ózbekstan Respýblikasynyń Samarqand qalasy men Ferǵana oblysyna bardy. Sonymen qatar, qala qolónershileri Ázerbaijan Respýblikasynyń Shýsha qalasynda Halyqaralyq TIýRKSOI uiymynyń uiymdastyrýymen ótken saltanatty sharaǵa qatysyp, «Hary-biýlbiýl» halyqaralyq folklorlyq festivalinde kópshilikke qazaqtyń ulttyq taǵamdary men qolóner sheberleriniń eń úzdik buiymdarynyń kórme-jármeńkesi usynyldy. Nátijesinde qazaqstandyq delegatsiia joǵary baǵa alyp, túrki halqynyń ystyq yqylasyna bólenip keldi.
Bul is-sharalarǵa Qazaqstanmen qatar, Ózbekstan, Tájikstan, Qyrǵyzstan, ózge de túrkitildes memleketterdiń ókilderi qatysty.
2024 jyl - Qytaidaǵy Qazaqstannyń týrizmi jyly. Osyǵan orai, Beijiń qalasynda aýqymdy is-sharalar men forýmdar ótti. Oǵan Qolóner odaǵynyń tóraiymy men sheberler arnaiy qatysty. Halyqaralyq kórmege Qolóner odaǵynyń sheberleri men shákirtteriniń qolónerleri kópshiliktiń ystyq yqylasyna bólenip, qyzyǵýshylyǵyn arttyrdy.
Álemniń halqaralyq qolóner qalalary uiymynyń (WCC International) prezidenti Saad ál-Qaddými túrkistandyq qolónershilerdiń jumysyna tańdanysyn jasyrmady. Saad myrza uiymdastyrýshylarǵa alǵysyn bildirip, Túrkistannyń ózine tán ereksheligi, qolónershilerdiń qalyptasqan qoltańbasy baryn atap ótti.
Qala qonaqtary rýhani-mádeni ortalyqtaǵy týristik nysandardy aralap, ózgeristerge tánti boldy.
