Memleket basshysynyń ataýly sheshiminen keıin óńirde tyń tendensıalar jolǵa qoıyldy, Túrkistan túleı bastady. Damýdyń tyń jolyna bet burǵan qalaǵa jańa tynys berildi. Ákimshilik ortalyqtyń Shymkent qalasynan Túrkistan qalasyna kóshirý yryqsyzdandyrý turǵysynan alǵanda úlken mánge ıe. Sebebi jekelegen qalalardan keıbir mártebelerdiń yǵysýy bul qalanyń ary qaraı damýyna keń múmkindik ashady.
Máselen, buǵan deıin Almaty el astanasy boldy, keıinnen bul mártebeden aıyrylyp, oblys ortalyǵy boldy, sodan keıin ǵana respýblıkalyq mańyzy bar qala laýazymyn aldy. Osylaısha Almaty óziniń damýyna jańa múmkindik aldy. Ońtústik Qazaqstan oblysynyń Túrkistan oblysy dep ózgerýiniń de máni zor ekenin Jumaly myrza tilge tıek etti.
Túrkistan degen kıeli ári qazaqı ataýdyń ıdeologıalyq ári tarıhı turǵyda da máni ústem ekendigin alǵa tartqan saıasattanýshy bul úrdistiń basqa óńirlerde de jalǵasyn tabýy nur ústine nur bolatyndyǵyn atap ótti.
Memleket basshysy Nursultan Nazarbaev 29 qyrkúıekte Túrkistan oblysyna memlekettik saparmen bardy. «Halqymyz úshin tarıhy baı, taǵylymy tereń Túrkistannyń elimiz úshin orny óte bólek. Ol – búkil Ortalyq Azıadaǵy eń kóne qalalardyń biri. Túrkistan – Qazaq eliniń rýhanı júregi, qazaqtyń kóptegen aıaýly perzentteri máńgige jaı tapqan qasıetti qala. Osynda jerlengen 164 áıgili tulǵanyń 21-i – el basqarǵan qyrandar, 30-dan astamy qol bastaǵan batyrlar, aýqymdy sóz bastaǵan bıler. Túrkistan tarıhy – kúlli qazaqtyń tarıhy»,– dedi Memleket basshysy.
Rasýl Jumaly, sarapshy.
