1 maýsym – Halyqaralyq balalardy qorǵaý kúni merekesine orai Sozaq aýdany, Jartytóbe aýylynda birqatar áleýmettik nysan paidalanýǵa berildi. Atap aitqanda, basketbol alańy, balalar oiyn alańshasy jáne «Street workout» sporttyq jattyǵý alańy el igiligine usynyldy, – dep habarlaidy Dalanews.kz
Atalǵan nysandar ótken jyly oblys kóleminde ótkizilgen «Úlgili aýyl» baiqaýy nátijesinde Jartytóbe aýylynyń júldeli orynǵa ie bolýyna bailanysty oblystyq biýdjet esebinen salyndy. Bul bastama aýyldyń áleýmettik infraqurylymyn jaqsartyp, turǵyndar úshin qolaily orta qalyptastyrýǵa baǵyttalǵan.
Ashylý saltanatyna arnaiy qatysqan aýdan ákimi Muhit Turysbekov aýyl turǵyndaryn merekemen jáne jańa nysandardyń iske qosylýymen quttyqtady. Sondai-aq aýdanda sportty damytý baǵytynda atqarylyp jatqan jumystar men aldaǵy josparlar jóninde keńinen aityp ótti.
Shara barysynda ardager ustaz, aýdannyń Qurmetti azamaty Áshimhan Tápi sóz sóilep, el igiligi jolyndaǵy bastamalarǵa uiytqy bolǵan azamattarǵa alǵysyn bildirse, aýyl qariiasy Baltabai Aimurzaev aq batasyn berip, sáttilik tiledi.
Jańa nysandar balalardyń bos ýaqytyn tiimdi ótkizýine, aýyl jastarynyń salaýatty ómir saltyn ustanýyna zor múmkindik bereri sózsiz.
Aita keteiik, Túrkistan oblysy ákimdiginiń bastamasymen jáne tikelei qoldaýymen «Úlgili aýyl» baiqaýy qolǵa alynǵan. Bul bastama «Taza Qazaqstan» baǵdarlamasyn júzege asyrý maqsatynda biyl da uiymdastyrylyp otyr.
