1 ماۋسىم – حالىقارالىق بالالاردى قورعاۋ كۇنى مەرەكەسىنە وراي سوزاق اۋدانى، جارتىتوبە اۋىلىندا ءبىرقاتار الەۋمەتتىك نىسان پايدالانۋعا بەرىلدى. اتاپ ايتقاندا، باسكەتبول الاڭى، بالالار ويىن الاڭشاسى جانە «Street workout» سپورتتىق جاتتىعۋ الاڭى ەل يگىلىگىنە ۇسىنىلدى، – دەپ حابارلايدى Dalanews.kz

اتالعان نىساندار وتكەن جىلى وبلىس كولەمىندە وتكىزىلگەن «ۇلگىلى اۋىل» بايقاۋى ناتيجەسىندە جارتىتوبە اۋىلىنىڭ جۇلدەلى ورىنعا يە بولۋىنا بايلانىستى وبلىستىق بيۋدجەت ەسەبىنەن سالىندى. بۇل باستاما اۋىلدىڭ الەۋمەتتىك ينفراقۇرىلىمىن جاقسارتىپ، تۇرعىندار ءۇشىن قولايلى ورتا قالىپتاستىرۋعا باعىتتالعان.

اشىلۋ سالتاناتىنا ارنايى قاتىسقان اۋدان اكىمى مۇحيت تۇرىسبەكوۆ اۋىل تۇرعىندارىن مەرەكەمەن جانە جاڭا نىسانداردىڭ ىسكە قوسىلۋىمەن قۇتتىقتادى. سونداي-اق اۋداندا سپورتتى دامىتۋ باعىتىندا اتقارىلىپ جاتقان جۇمىستار مەن الداعى جوسپارلار جونىندە كەڭىنەن ايتىپ ءوتتى.

شارا بارىسىندا ارداگەر ۇستاز، اۋداننىڭ قۇرمەتتى ازاماتى ءاشىمحان ءتاپى ءسوز سويلەپ، ەل يگىلىگى جولىنداعى باستامالارعا ۇيىتقى بولعان ازاماتتارعا العىسىن بىلدىرسە، اۋىل قارياسى بالتاباي ايمۇرزايەۆ اق باتاسىن بەرىپ، ساتتىلىك تىلەدى.

جاڭا نىساندار بالالاردىڭ بوس ۋاقىتىن ءتيىمدى وتكىزۋىنە، اۋىل جاستارىنىڭ سالاۋاتتى ءومىر سالتىن ۇستانۋىنا زور مۇمكىندىك بەرەرى ءسوزسىز.

ايتا كەتەيىك، تۇركىستان وبلىسى اكىمدىگىنىڭ باستاماسىمەن جانە تىكەلەي قولداۋىمەن «ۇلگىلى اۋىل» بايقاۋى قولعا الىنعان. بۇل باستاما «تازا قازاقستان» باعدارلاماسىن جۇزەگە اسىرۋ ماقساتىندا بيىل دا ۇيىمداستىرىلىپ وتىر.