Túrkistan oblysynyń ákimi Darhan Satybaldynyń tóraǵalyǵymen aýdan, qalalardyń damý josparyn talqylap, bekitý jumystary jalǵasýda. Búgin Túlkibas aýdanynyń ákimi Nurjan Iztileýov aýdannyń 2025-2030 jyldarǵa arnalǵan «Ekonomikalyq ósýdi qamtamasyz etý boiynsha» strategiialyq bastamalardy júzege asyratyn jol kartasynyń negizgi baǵyttary men kórsetkishterin baiandady, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Damý tujyrymdamalaryna qatysty ekonomika, aýyl sharýashylyǵy, kásipkerlik, týrizm salalaryn damytyp, jumyspen qamtý úshin tiisti basqarma basshylarynyń usynystary qaraldy.
Oblys ákimi aimaqty damytý boiynsha naqty tapsyrmalar berdi. Zaýyt, fabrikalar ashýǵa kúsh salýdy, turalap qalǵan óndiris oryndaryn qaita jandandyrýdy tapsyrdy.
– Ár aýdandy damytýda barlyq múmkindikti paidalanǵan durys. Basty talap – aýyldy kóterý kerek. Damytyp, kórkeitý kerek. Halyqtyń áleýmettik jaǵdaiyn jaqsartý úshin júieli túrde jumys júrgizgen durys. Alda atqarylar jumystardyń naqty jospary bekitilip, sol jumysty kúsheitý qajet. Túlkibas aýdanynda da jumystardy shiratý kerek. Jańa jobalar jetkiliksiz. Áli de tiisti deńgeide emes. Jumys barysynda júieli ustanym bolýy qajet. Infraqurylymy damyǵan bul aimaqqa kásipkerler umtylatyndai jaǵdai jasalýy tiis. Ol úshin ákim ishki jáne syrtqy investitsilardy tartýda úzdiksiz jumys isteýi kerek. Tabiǵaty qolaily aimaqta áli kúnge tristerdi tartatyn jobalar jetkiliksiz, – dedi Darhan Satybaldy.
Aýdan ákiminiń baiandaýynsha, Túlkibas aýdanyn damytý úshin aýyl sharýashylyǵy, ónerkásip, kásipkerlik jáne týrizm baǵytynda jumys atqarylady. Ol úshin investitsiia tartyp, jańa tehnologiialardy endire otyryp ónimdilikti arttyrý, jumyssyzdyq deńgeiin tómendetý basym baǵyt retinde tańdalyp otyr.
Ótken jyldyń qorytyndysymen jalpy óńirlik ónim 99,5 mlrd. teńgege jetken. 20 mlrd. teńge investitsiia tartylǵan, biyl onyń kólemin 35,8 mlrd. teńgege deiin arttyrýdy josparlanǵan. 2024 jyl 8 aidyń qorytyndysymen ónerkásip óniminiń kólemi 11,3 mlrd. teńgeni qurady.
2030 jylǵa deiin 400 mlrd. teńgeden asatyn 100-ge jýyq jańa joba júzege asyp, 3 myńnan astam jumys orny ashylmaq. Ónerkásipti damytý úshin jalpy investitsiialyq quny 327,2 mlrd. teńgeni quraityn 13 jobany iske asyrý josparlanýda. 2 myńnan astam jańa jumys orny ashylmaq. Aýyl sharýashylyq salasynda investitsiialyq quny 29,6 mlrd. teńgeni quraityn 14 jobany iske asyryp, ónim kólemin 158,3 mlrd. teńgege deiin jetkizý josparlanǵan.
«Túlkibas» indýstrialdy aimaǵynyń aýmaǵynda qus fabrikasynyń, balyqty kirpish zaýyty, qýattylyǵy 320 MVt gaz týrbinaly elektr stantsiiasynyń qurylysy josparlanǵan.
Qarqyndy alma baý, balyq sharýashylyǵy, jemis-jidekterin qaita óńdeý, qurama jem óndirý zaýyty, sútti baǵyttaǵy asyl tuqymdy iri qara mal sharýashylyǵy salasynda jańa jobalar josparlanǵan.
