Memleket basshysynyń tapsyrmasy negizinde 2024-2025 jyldary Túrkistan oblysynyń barlyq aýdan jáne qalalarynda «Otbasyn qoldaý ortalyqtary» ashyldy. Qazirgi tańda óńirde 17 ortalyq jumys istep tur, - dep habarlaidy Dalanews.kz
Búgin oblys ákiminiń orynbasary Beisenbai Tájibaevtyń tóraǵalyǵymen atalǵan ortalyqtardyń qyzmetin jetildirý, materialdyq-tehnikalyq bazasyn nyǵaitý boiynsha májilis ótti. Jiynǵa jaýapty basqarma ókilderi men ortalyqtardyń direktorlary qatysty. Túrkistan oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Kúmis Mirova atqarylyp jatqan jumystar men kórsetkishter týraly baiandady. Onyń málimdeýinshe, hattamalyq tapsyrma negizinde ortalyqtardyń jumysyna, nysandardyń jaǵdaiyna jáne shtattyq qurylymdaryna zerdeleý júrgizilgen. Nátijesinde, ortalyqtardy jeke ǵimaratpen qamtý, materialdyq-tehnikalyq bazasyn jasaqtaý, internetke qoljetimdiligin arttyra otyryp, shtattyq qurylymdaryn eń tómengi shtattyq normativterge sáikestendirý, ómirlik qiyn jaǵdaidaǵy otbasylarmen tikelei bailanysta bolatyn mamandardyń biliktiligin jetildirý qajettiligi anyqtaldy.
Oblys ákiminiń orynbasary áleýmettik osal toptaǵy azamattarǵa tiisti qoldaýlar turaqty kórsetilýi mańyzdy ekenin aityp, jumystardy jandandyrýdy tapsyrdy.
— Otbasy – qoǵamnyń turaqtylyǵy men rýhani damýynyń irgetasy. Bul – jeke tulǵanyń alǵashqy tárbiesi qalyptasatyn, adami qundylyqtar men ulttyq bolmystyń urpaqtan urpaqqa beriletin eń mańyzdy áleýmettik ortasy. Sondyqtan, túrli quqyqbuzýshylyqtar men zorlyq-zombylyq, erte jastaǵy júktilik syndy keleńsiz jaittardyń aldyn alý úshin osy salaǵa erekshe kóńil bólý mańyzdy. Osy tusta, jumystardy jandandyrýdy tapsyramyn. Ár aimaqtaǵy qylmys kórsetkishi joǵary núktelerdi belgilep, jumys kartasyna engizińizder. Áleýmettik osal toptaǵy azamattarǵa meditsinalyq, psihologiialyq, quqyqtyq qoldaýlar turaqty kórsetilýi kerek. Olardy jumyspen qamtýdy da nazarǵa alyńyzdar. Bul oblys ákimi Nuralhan Kósherovtiń baqylaýyndaǵy basty máselelerdiń biri ekenin eske salamyn, – dedi Beisenbai Dáýletuly.
Túrkistan oblysynda jalpy 507 myńnan astam otbasy bar. Onyń ishinde D jáne E sanatynda 127 myńnan astamy nemese 25,1% tirkelgen. Olardyń sany jyl basynan beri 19 myńnan astam otbasyna ne 13,4%-ǵa tómendegen. Aqparattyq júie arqyly azamattardyń áleýmettik ál-aýqatynyń deńgeiin aiqyndaýǵa bolady. Óńirdegi mobildik top arqyly mundai otbasylarǵa qatysty derekterdi ózektendirý boiynsha metodikalyq kómek kórsetildi. Sondai-aq biyl qiyn jaǵdaiǵa tap bolǵan turǵyndardyń ahýaly men áleýmettik máselesin erte anyqtaý úshin FSM Social mobildi qosymshasy iske qosyldy. Qazirgi tańda ortalyqtardy tirkeý jumystary jalǵasýda.
Aita keteiik, ortalyqtardyń negizgi fýnktsiiasy – otbasy saiasatyn júzege asyrý, neke men otbasyn saqtaý,turmystyq, genderlik zorlyq-zombylyqtardyń aldyn alý, aqparattyq-túsindirý jumystaryn júrgizýge baǵyttalǵan.
