مەملەكەت باسشىسىنىڭ تاپسىرماسى نەگىزىندە 2024-2025 جىلدارى تۇركىستان وبلىسىنىڭ بارلىق اۋدان جانە قالالارىندا «وتباسىن قولداۋ ورتالىقتارى» اشىلدى. قازىرگى تاڭدا وڭىردە 17 ورتالىق جۇمىس ىستەپ تۇر، - دەپ حابارلايدى Dalanews.kz
بۇگىن وبلىس اكىمىنىڭ ورىنباسارى بەيسەنباي تاجىبايەۆتىڭ توراعالىعىمەن اتالعان ورتالىقتاردىڭ قىزمەتىن جەتىلدىرۋ، ماتەريالدىق-تەحنيكالىق بازاسىن نىعايتۋ بويىنشا ءماجىلىس ءوتتى. جيىنعا جاۋاپتى باسقارما وكىلدەرى مەن ورتالىقتاردىڭ ديرەكتورلارى قاتىستى. تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى كۇمىس ميروۆا اتقارىلىپ جاتقان جۇمىستار مەن كورسەتكىشتەر تۋرالى باياندادى. ونىڭ مالىمدەۋىنشە، حاتتامالىق تاپسىرما نەگىزىندە ورتالىقتاردىڭ جۇمىسىنا، نىسانداردىڭ جاعدايىنا جانە شتاتتىق قۇرىلىمدارىنا زەردەلەۋ جۇرگىزىلگەن. ناتيجەسىندە، ورتالىقتاردى جەكە عيماراتپەن قامتۋ، ماتەريالدىق-تەحنيكالىق بازاسىن جاساقتاۋ، ينتەرنەتكە قولجەتىمدىلىگىن ارتتىرا وتىرىپ، شتاتتىق قۇرىلىمدارىن ەڭ تومەنگى شتاتتىق نورماتيۆتەرگە سايكەستەندىرۋ، ومىرلىك قيىن جاعدايداعى وتباسىلارمەن تىكەلەي بايلانىستا بولاتىن مامانداردىڭ بىلىكتىلىگىن جەتىلدىرۋ قاجەتتىلىگى انىقتالدى.
وبلىس اكىمىنىڭ ورىنباسارى الەۋمەتتىك وسال توپتاعى ازاماتتارعا ءتيىستى قولداۋلار تۇراقتى كورسەتىلۋى ماڭىزدى ەكەنىن ايتىپ، جۇمىستاردى جانداندىرۋدى تاپسىردى.
— وتباسى – قوعامنىڭ تۇراقتىلىعى مەن رۋحاني دامۋىنىڭ ىرگەتاسى. بۇل – جەكە تۇلعانىڭ العاشقى تاربيەسى قالىپتاساتىن، ادامي قۇندىلىقتار مەن ۇلتتىق بولمىستىڭ ۇرپاقتان ۇرپاققا بەرىلەتىن ەڭ ماڭىزدى الەۋمەتتىك ورتاسى. سوندىقتان، ءتۇرلى قۇقىقبۇزۋشىلىقتار مەن زورلىق-زومبىلىق، ەرتە جاستاعى جۇكتىلىك سىندى كەلەڭسىز جايتتاردىڭ الدىن الۋ ءۇشىن وسى سالاعا ەرەكشە كوڭىل ءبولۋ ماڭىزدى. وسى تۇستا، جۇمىستاردى جانداندىرۋدى تاپسىرامىن. ءار ايماقتاعى قىلمىس كورسەتكىشى جوعارى نۇكتەلەردى بەلگىلەپ، جۇمىس كارتاسىنا ەنگىزىڭىزدەر. الەۋمەتتىك وسال توپتاعى ازاماتتارعا مەديسينالىق، پسيحولوگيالىق، قۇقىقتىق قولداۋلار تۇراقتى كورسەتىلۋى كەرەك. ولاردى جۇمىسپەن قامتۋدى دا نازارعا الىڭىزدار. بۇل وبلىس اكىمى نۇرالحان كوشەروۆتىڭ باقىلاۋىنداعى باستى ماسەلەلەردىڭ ءبىرى ەكەنىن ەسكە سالامىن، – دەدى بەيسەنباي داۋلەت ۇلى.
تۇركىستان وبلىسىندا جالپى 507 مىڭنان استام وتباسى بار. ونىڭ ىشىندە د جانە ە ساناتىندا 127 مىڭنان استامى نەمەسە 25،1% تىركەلگەن. ولاردىڭ سانى جىل باسىنان بەرى 19 مىڭنان استام وتباسىنا نە 13،4%-عا تومەندەگەن. اقپاراتتىق جۇيە ارقىلى ازاماتتاردىڭ الەۋمەتتىك ءال-اۋقاتىنىڭ دەڭگەيىن ايقىنداۋعا بولادى. وڭىردەگى موبيلدىك توپ ارقىلى مۇنداي وتباسىلارعا قاتىستى دەرەكتەردى وزەكتەندىرۋ بويىنشا مەتوديكالىق كومەك كورسەتىلدى. سونداي-اق بيىل قيىن جاعدايعا تاپ بولعان تۇرعىنداردىڭ احۋالى مەن الەۋمەتتىك ماسەلەسىن ەرتە انىقتاۋ ءۇشىن FSM Social ءموبيلدى قوسىمشاسى ىسكە قوسىلدى. قازىرگى تاڭدا ورتالىقتاردى تىركەۋ جۇمىستارى جالعاسۋدا.
ايتا كەتەيىك، ورتالىقتاردىڭ نەگىزگى فۋنكسياسى – وتباسى ساياساتىن جۇزەگە اسىرۋ، نەكە مەن وتباسىن ساقتاۋ،تۇرمىستىق، گەندەرلىك زورلىق-زومبىلىقتاردىڭ الدىن الۋ، ءاقپاراتتىق-تۇسىندىرۋ جۇمىستارىن جۇرگىزۋگە باعىتتالعان.
