Ol úshin «Indýstrıaldy-ınnovasıalyq damý baǵdarlamasy» sheńberinde ınvestısıa tarta otyryp, jalpy quny 3537 mıllıon teńgeni quraıtyn 6 ınvestısıalyq jobany iske asyrý josparlanǵan. Atap aıtqanda, bıyl aýdanda asfált-beton zaýyty, polıetılen ónimderiniń jáne medısınalyq maqta ónimderiniń óndirisi, sondaı-aq temirdi qaıta óńdeý óndirisi men logıstıkalyq ortalyq jáne kún elektr stansasynyń jobalary iske asatyn bolady.
– Qazirgi tańda aýdannyń ındýstrıaldy aımaǵynan jer bólinip, qurylysy bastalǵan «Soldatos» JSHS-nyń asfált-beton zaýytyn salýǵa 300 mln teńge jumsalmaq. Joba boıynsha 30 adam jumyspen qamtylyp, saǵatyna 300 tonna asfált-beton ónimderi óndiriletin bolady. Sondaı-aq, «Radjapov» jeke kásipkerliginiń «Polıetılen ónimderiniń óndirisi» jobasynyń qurylysy aǵymdaǵy jyldyń maýsym aıynda bastalady dep kútilýde. Jobanyń qurylysyna 200 mıllıon teńge jumsalyp, jańadan 36 jumys orny ashylady, – dedi Baqyt Násirhanuly.
Oblys boıynsha maqta shıkizatynyń 80 paıyzy Maqtaral aýdanyna tıesili bolǵanymen, óńirde shıkizatty ári qaraı daıyn ónimge aınaldyratyn kásiporyndar tapshy. Osy maqsatty «Aıbek» sharýa qojalyǵy medısınalyq maqta ónimderiniń óndirisi jobasyn qolǵa alǵan. Indýstrıaldy aımaqtan jer bólinip, qurylysy bastalǵan jobaǵa 85 mıllıon teńge qarjy jumsalmaq. Kásiporyn 28 adamdy jumyspen qamtyp, jylyna 2 mıllıon dana medısınalyq maqta ónimderin óndiretin bolady.
Aǵymdaǵy jyly iske qosylatyn 6 ınvestısıalyq jobanyń jáne basqa da jumys istep turǵan kásiporyndardyń esebinen jyl aıaǵyna deıin aýdandaǵy ónerkásip óniminiń kólemi 13,7 mlrd teńgege jetkizý josparlanǵan
