TJM qutqarýshylary teńiz deńgeiinen 2400 metr biikte qutqarý operatsiiasyn júrgizdi, dep habarlaidy dalanews.kz.
Operatsiia Tólebi aýdanyndaǵy Aqsý-Jabaǵyly memlekettik tabiǵi qoryǵy aýmaǵynda ornalasqan, teńiz deńgeiinen 2400 metr biiktegi Shúnkildek asýynda ótti. Bul oqiǵa týraly habarlama er adamnan túsken.
Ol taýly aimaqta birge bolǵan dosynyń densaýlyǵy kúrt nasharlap, qaitys bolǵanyn habarlaǵan. Ózi de jaǵdaiy nasharlaýyna bailanysty taýdan ózdiginen túse almai, qutqarýshylardyń kómegine muqtaj bolǵan.
Oqiǵa ornyna TJM kúshteri men quraldary dereý jiberildi. Qutqarý jumystaryna TJM-niń "Qazaviaqutqarý" AQ tikushaǵy da jumyldyryldy. Tikushaqtyń kómegimen jetýi qiyn taýly aimaqtan 1993 jyly týǵan er adam evakýatsiialandy. Ony qaýipsiz jerge jetkizgennen keiin jedel járdem brigadasynyń dárigerleri qarap, meditsinalyq kómek kórsetti.
Sondai-aq, taýdan 1978 jyly týǵan er adamnyń denesi túsirildi. Aldyn ala málimet boiynsha, ol densaýlyǵy kúrt nasharlaýy saldarynan qaitys bolǵan.
