Túrkistan oblysynda 17 jastaǵy jasóspirimniń ólimine ákep soqqan atysqa bailanysty alty adam sottaldy, dep habarlaidy dalanews.kz.
Jetinshi arnanyń málimetinshe, oqiǵa byltyr qarasha aiynda Túlkibas aýdanynda bolǵan. Betperde kigen adamdar kóshede turǵan tórt jigitke oq jaýdyrǵan. Sonyń saldarynan 17 jastaǵy bozbala oqiǵa ornynda kóz jumyp, taǵy úsh adam túrli jaraqatpen aýrýhanaǵa jetkizilgen.
Qylmystyq is aiasynda jeti adam kúdikke ilingen. Olardyń biri izdeýde júr. Qazirgi ýaqytta oǵan qatysty tergeý jalǵasyp jatyr. Al ustalǵan alty adamnyń isi sotta qaraldy.
Mamandandyrylǵan aýdanaralyq sottyń tóraǵasy Dáýren Madalievtiń aitýynsha, aiyptalýshylardyń úsheýi oqiǵa ornyna baryp, jábirlenýshilerge qarýdan oq atqan. Qalǵan úsheýi shabýylǵa qatysýdan bas tartqanymen, qarý qoldanylatynyn aldyn ala bilgen. Soǵan qaramastan olar bul týraly politsiiaǵa habarlamaǵan.
Sot úkimimen negizgi aiyptalýshy 20 jylǵa bas bostandyǵynan aiyryldy. Jaza taǵaiyndaý kezinde onyń buǵan deiin de qylmys jasaǵany eskerilgen. Taǵy eki sottalýshy 18 jylǵa sottaldy.
Qylmysty jasyrdy dep tanylǵan eki adamǵa tiisinshe úsh jáne eki jyl túrme jazasy berildi. Al taǵy bir sottalýshynyń bas bostandyǵy 2 jyl 8 aiǵa shekteldi. Keiin oǵan raqymshylyq qoldanylyp, sot zalynan bosatyldy.
