"Túrkistan oblysynda medısına salasynda jasalyp jatqan jumystar jetkilikti. Olar - kompútermen qamtamasyz etý bolsyn, sıfrlandyrý bolsyn, mekemelerdi kóliktermen qamtamasyz etý bolsyn, barlyǵy óz retimen, jetkilikti deńgeıge júrgizilip keledi. Ásirese, salalyq dárigerlerdiń bilimin jetildirý jumystaryna toqtalar bolsaq, ótken jyldardy aıtpaǵannyń ózinde, bıyl birneshe maman shetelde bilimin jetildirip qaıtty. Bul, óz kezeginde, óńirimizdegi atalǵan salanyń odan ári damyp, órkendeýine jol ashady dep bilemin", - dedi ákim ortalyqqa tartý etilgen kólikterdiń kiltin tabystaý kezinde.
Osyǵan deıin "Túrkistan qalalyq jedel-járdem medısınalyq stansasy" bolyp kelgen mekeme ataýyn "Oblystyq jedel-járdem medısınalyq ortalyǵyna" aýystyryp, oblystyq mártebege ıe bolǵan medısınalyq nysan jańa ǵımaratqa kóshti. Oblys aýmaǵynda táýligine emhanalyq kómekke qaralatyn 34 myń adamǵa jedel medısınalyq kómekke júginetin 5 myńnan astam adam tirkeledi.
Ortalyq tolyqtaı “Kómek” baǵdarlamasynyń avtomattandyrylǵan basqarý júıesimen jumys isteıdi. Sonymen qatar, 2019 jyldan bastap Túrkistan oblysynyń aýdandaryndaǵy Jedel-járdem stansalary Túrkistan oblysynyń densaýlyq saqtaý basqarmasynyń “Oblystyq jedel-járdem medısınalyq stansasy” SHJQ MKK bolyp ortalyqtandyrylmaq. Bul jerde Call - ortalyǵy jumys isteıdi. Barlyq aýdandardaǵy jedel járdem stansasynyń jumysy osy ortalyqtyń qadaǵalaýynda bolady. Bul degenimiz, Túrkistan oblysynyń kez kelgen eldi mekeninen jedel járdem kómegine júgingen naýqastyń qońyraýy tikeleı ortalyqqa qosylady degen sóz. Shaqyrtý túsken jerge eń jaqyn brıgadany anyqtap, naýqas jaıly tolyq aqparat jiberiledi. Osylaısha, alǵashqy medısınalyq kómek jedel ári sapaly kórsetiledi.
Medısınalyq uıymdardy materıaldyq- tehnıkalyq qondyrǵylarmen qamtamasyz etýge bıyl 8 mlrd. teńge bólinip, jaraqtalý kórsetkishi 65,7%- ǵa jetken. Aldaǵy ýaqytta Túrkistan oblysynda perınataldyq, mamandandyrylǵan kardıologıalyq, onkologıalyq, psıhonevrologıalyq, narkologıalyq ortalyqtar men emhanalar salý josparlanýda. Jyl basynan beri 47 sanıtarlyq jáne arnaıy avtokólik satyp alynyp, halyq ıgiligine paıdalanýǵa berilgen. Sondaı-aq, memlekettik -jekemenshik áriptestik aıasynda jedel járdem qyzmetin senimgerlikke basqarýǵa berý josparlanyp otyr. Bul baǵytta oblys boıynsha 150 sanıtarlyq avtokólikpen qamtamasyz etý kózdelýde.
Elbasy N.Á.Nazarbaevtyń Qazaqstan halqyna arnaǵan Joldaýynda berilgen tapsyrmalardyń biri - 2019 jyldyń 1 qańtarynan bastap medısına salasy qaǵazsyz qujat aınalymyna kóshirý bolatyn. Elbasy bıylǵy Joldaýynda «Aqparattyq júıelerdi biriktirý, mobıldik sıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medısınalyq kómektiń qoljetimdiligi men tıimdiligin arttyrý qajet», dep densaýlyq saqtaý salasynyń mamandaryna mindet júktegeni belgili. Memleket basshysynyń joldaýda kórsetilgen tapsyrmasyn basty nazarǵa ala otyryp, Túrkistan oblysynyń densaýlyq saqtaý salasy 100% sandyq júıege kóship, qaǵazsyz jumys isteýge bet burdy.
Túrkistan oblysy ákiminiń baspasóz qyzmeti
