Keptirilgen azyq-túlik túri mezgilaralyq jemis tapshylyǵy kezinde halyqty jemis-jıdek ónimderimen úzdiksiz jáne ýaqtyly qamtamasyz etýde qolaıly.
Sonymen qatar adam aǵzasy úshin keptirilgen jemistiń orasan zor paıdasy jóninde de aıta ketken jón bolar.
– Bizdiń shyǵaratyn ónimder negizinen paprıkanyń, almanyń, óriktiń, pıazdyń, sańyraýqulaqtyń, ıtmurynnyń, dolananyń keptirilgen túri bar. Shıkizatty jergilikti sharýa qojalyqtary daıyndap beredi. Olarmen arnaıy kelisim-sharttar túzilgen. Qazirgi kúni jıyrma shaqty sharýa qojalyǵymen jumys isteımiz. Jyl saıyn aldyn-ala tapsyrys berip, qajetti shıkizatty daıyndatamyz. Óndiris kólemi tapsyrysqa qaraı ártúrli, biraq jyldyq normamyz 100 tonnadan kem emes, – deıdi sharýashylyq basshysy.
Osy kásibimizdi bastaý úshin 2016-jyly «Ońtústik» aımaqtyq ınvestısıalyq ortalyǵynan memlekettik baǵdarlama boıynsha 7 jylǵa 7 paıyzben nesıe alǵanbyz. Mundaı baǵdarlamalardyń artyqshylyǵy – paıyzdyq ústemesi tómen. Onyń ústine bizge berilgen bir jyldyq demalysy, ıaǵnı tólemdi bir jyl ótkizip baryp tóleý múmkinshiligi bar. Bankter qajetti qarjyny 15 paıyzben beretin bolsa, «Ońtústik» aımaqtyq ınvestısıalyq ortalyǵy bizge 7 paıyzben berip otyr. Bul kásipkerler úshin óte yńǵaıly. Osyndaı jeńildetilgen nesıeler jumysqa degen qulshynysty arttyryp qana qoımaı, kóp adamdy jumyspen qamtýǵa da múmkindik beredi. Búgingi tańda bizde 40 shaqty adam jumys isteıdi. Ortasha jalaqylary 60-100 myń teńge arasynda.
Búgingi tańda ónimderimizdiń nebári 5 paıyzy ǵana Qazaqstan ishinde satylady. Qalǵany Qytaı, Ýkraına, Reseı, Úndistan elderine eksportqa shyǵarylady. Elimizde bizdiń taýarǵa degen suranys bar, biraq óte tómen. Biz kásibimizdi basynda eksportqa jumys isteýge daıyndalyp bastaǵanbyz, Qazaqstan boıynsha úlesimiz bes paıyzdy qurap otyrǵany da sondyqtan.
Bolashaqta kásiporyn sýblımasıalyq, ıaǵnı birden muzdatyp, keptirý ádisin et ónimderine daıyndaýǵa nıettenip otyr eken. Munyń artyqshylyǵy – ettiń quramy tolyqtaı saqtalady jáne onyń saqtaý merzimi de uzarady. Mundaı ádispen keptirilgen et azdaǵan sý qosylǵan soń qaıta qalpyna kele alady.
Dalanews.kz
