Túrkistan óńirinde barlyǵy 870 myń azamat jalpy zeinetaqy men arnaiy áleýmettik tólem alady.
Olardyń qarjy qajettiligine ai saiyn 24,1 mlrd teńge jumsalady. QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komitetiniń Túrkistan oblysy boiynsha departamentiniń basshysy Á.Temirbaevanyń aitýynsha, budan bólek biylǵy jyldan bastap arnaýly memlekettik járdemaqy tólemine ózgertýler men tolyqtyrýlar engizilgen.
«2018 jyldyń 1 qańtaryna oblys kóleminde arnaýly memlekettik járdemaqy alýshylardyń sany 298 353-ti qurap, oǵan 2,3 mlrd. teńge kóleminde tólem júrgizilgen.
Biyldan bastap mundai járdemaqynyń quramynan «Altyn Alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kóp balaly analarǵa memlekettik járdemaqy sanaty bólinip, jeke memlekettik qyzmet túri bolyp qosyldy.
Osy atalǵan járdemaqy boiynsha 2018 jyldyń birinshi toqsanynda 70 147 memlekettik qyzmet kórsetildi», – deidi Ásiia Quralqyzy.
Sondai-aq, departament basshysy 2018 jyldyń 1 qańtarynan bastap kezeń-kezeńimen áielderdiń zeinetke shyǵý jasy ulǵaiǵanyn aitty. 1960 jyldyń 1 qańtarynda týylǵan áiel zeinetke 2018 jyldyń 1 shildesinde, iaǵni, 58,6 jasynda shyǵady. Eger áiel 1960 jyldyń 1 shildesinde týylǵan bolsa, onyń zeinetkerlik jasy 59 keledi. Sebebi, 2019 jyldyń 1 qańtaryna onyń jasy 58,6 tolǵanymen, 2019 jyly jalpy belgilengen zeinetkerlik jas 59-dy quraidy.
Aita keteiik, 2018 jyldyń 1 qańtaryndaǵy jaǵdai boiynsha oblysta jalpy 234 924 zeinetker bar. Olarǵa 10,0 mlrd teńge kóleminde zeinetaqy tólemi júrgizilgen.
