Atalǵan baıqaý oblystaǵy jastar saıasatyn júzege asyrý jáne memlekettik jastar saıasatynyń damýyna, eldiń saıası jáne qoǵamdyq ómirine belsene aralasyp, belsendiligimen top jarǵan jastardy anyqtaý jáne marapattaý maqsatynda uıymdastyryldy.
Saltanatty sharada Túrkistan oblysy ákiminiń orynbasary Beısenbaı Tájibaev «Túrkistan jastar premıasy» ıegerlerin quttyqtap, marapattady.
«Táýelsizdik alǵan jyldan bastap memleket tarapynan jastarǵa únemi qoldaý kórsetilip kele jatqanyn bilesizder. Óńirimizde mádenıet, ádebıet, sport, óner syndy túrli salada talmaı eńbektenip, eldiń yqylasyna bólenip júrgen jastar kóp. Talantymen tanylǵan shyn sheberler úlken jetistikterge jetip júr. Alda sanaýly kúnderden keıin oblystyń alǵashqy bes jyldyǵy ótedi. Túrkistan oblysy basqa óńirlerge qaraǵanda adam resýrstarynyń kapıtaly boıynsha kósh basynda tur. Sonyń ishinde, ásirese, jastar az emes. Prezıdentimizdiń bastamasyna oraı qazir jastardyń jas erekshiligi 35 jasqa deıin ulǵaıtyldy. Onyń ıgiligin jastardyń barlyǵy kóredi dep oılaımyn. Bizdiń oblysymyzdaǵy jastar sany 700 myńǵa artyp otyr. Bul degenimiz orasan zor kúsh, qazirde bizdiń jastarymyz kóptegen salalarda kóshbasshy bolyp keledi», - dedi Beısenbaı Dáýletuly.
Sonymen, «Úzdik Jastar resýrstyq ortalyǵy KMM-i» atalymy boıynsha Saryaǵash aýdany jáne Tólebı aýdandyq Jastar resýrstyq ortalyǵy marapattaldy. Al, «Úzdik Jastar resýrstyq ortalyǵy KMM-niń mamany» nomınasıasyn qazyǵurttyq Aqtóre Qaırat ıelendi. «Úzdik jas muǵalim» nomınasıasyna shardaralyq Maqsat Pirimbet, «Úzdik jas dáriger» nomınasıasyna qazyǵurttyq Aısara Rahmanberdi laıyq dep tanyldy.
Sondaı-aq, «Úzdik jas volonter» atalymy boıynsha túrkistandyq Gúlim Qaldaıaq, «Úzdik jas sportshy» atalymy boıynsha shardaralyq Qydyrǵalı Ońǵarbaev, «Úzdik jas memlekettik qyzmetker» atalymy boıynsha túrkistandyq Gúlzıa Qarsybaı marapattalsa, «Úzdik jas kásipker» nomınasıasyn arystyq Úsen Arystan ıemdendi. Sol sekildi «Úzdik jas akter» nomınasıasy kentaýlyq Aq-Sultan Ánýarbekke, «Úzdik jas kóshbasshy» nomınasıasy arystyq Arýjan Shekerbekke, «Úzdik jas gıd» nomınasıasy otyrarlyq Janbolat Ábjapparǵa buıyrdy. «Úzdik jaıdarmanshy» bolyp tólebılik Bereke Nabıhanuly tanylsa, «Úzdik shyǵarmashylyq ujym» nomınasıasyn Túrkistan mýzykalyq-drama teatrynyń balet ártisteri jáne «Beıbit ómir batyry» nomınasıasyn qazyǵurttyq Meırambek Rysbek ıelendi.
Budan bólek, oblystyq buqaralyq aqparat ókilderi arasyndaǵy atalymdar boıynsha báıdibektik Ulan Abzaluly «Úzdik jas fototilshi» marapatyn alsa, «Úzdik jas tilshi» bolyp saryaǵashtyq Halıma Tájıeva tanyldy. Al, joǵary oqý ornynyń «Úzdik stýdenti» nomınasıasyna saıramdyq Atabek Álibekuly, orta arnaýly oqý ornynyń «Úzdik stýdenti» nomınasıasyna ordabasylyq Saıat Erlan, «Úzdik oqýshy» nomınasıasyna túlkibastyq Aleksandra Demýs, Úzdik «Ózin-ózi basqarý uı̆ymy» nomınasıasyna Túlkibastaǵy A.Asqarov atyndaǵy jalpy orta mektebi ıe boldy. Osy tusta jastar syılyǵyna ár atalym boıynsha 100 myń teńge kóleminde qarjylaı syılyq taǵaıyndalǵanyn aıta ketken jón.
Kesh sońy konserttik baǵdarlamaǵa ulasty.
