Túrkistan qalasyndaǵy Etnoaýyl kesheninde Qazaqstan halqynyń tilder kúni merekesine orai, oblystyq ózbek etnomádeni birlestiginiń «Ózbek etnosynyń tili, mádenieti jáne dástúrleri» merekelik is-sharasy ótti, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Qazaqstan halqy Assambleiasy men Qazaqstan ózbekteri etnomádeni birlestikteri «Dostyq» qaýymdastyǵy, oblystyq ózbek etnomádeni birlestigi uiytqy bolǵan is-sharada ózbek halqynyń ulttyq taǵamdary men qolóner buiymdarynyń kórmesi uiymdastyrylyp, arnaiy kontserttik baǵdarlama kópshiliktiń nazaryna usynyldy.
Merekelik is-sharaǵa Qazaqstan halqy Assambleiasy Tóraǵasynyń orynbasary, QR Prezidenti Ákimshiligi QHA Hatshylyǵynyń meńgerýshisi Marat Ázilhanov, Ózbekstannyń Qazaqstandaǵy tótenshe jáne ókiletti elshisi Baqtiiar Ibragimov, QR Parlamenti Senatynyń depýtattary Darhan Qydyráli, Alisher Satvaldiev, Gennadii Shipovskih, Amangeldi Ǵabdilkárimuly, Ǵaliasqar Tólendiuly, Túrkistan oblysy ákiminiń orynbasary Ertai Altaev, sondai-aq oblystyq QHA janyndaǵy, Aqsaqaldar, Analar keńesi, etnomádeni birlestik tóraǵalary men músheleri qatysty.
Kópshilik aldynda quttyqtaý sóz sóilegen QHA Tóraǵasynyń orynbasary Marat Ázilhanov, Túrkistan oblysy ákiminiń orynbasary Altaev Ertai Kenjebekuly, Ózbekstannyń Qazaqstandaǵy tótenshe jáne ókiletti elshisi Baqtiiar Ibragimov jáne Senat depýtattary elimizdiń berekeli birligin nyǵaitýdyń mańyzyna keńinen toqtaldy.
Ózbekstannyń Qazaqstandaǵy Tótenshe jáne ókiletti elshisi barsha etnostardyń tili men mádenietiniń saqtalýyna tolyq jaǵdai jasalǵanyna rizashylyǵyn bildirip, mundaǵy igi bastamalar jalpy túrki álemine úlgi, birligi úshin mańyzdy ekenin tilge tiek etti.
Merekelik jiynda oblystyń qoǵamdyq-saiasi ómirine belsene qatysyp, qoǵamdyq kelisim men jalpyulttyq birlikti qamtamasyz etýge qosqan eleýli úlesi úshin birqatar azamattar arnaiy marapattaldy.
Berekeli birlikke úndegen merekelik is-shara oblysqa tanymal mádeniet salasy ónerpazdarynyń gala kontsertine ulasty.
