Túrkistan oblysynda sabaq kezinde karta oinaǵan oqýshylardyń videosy áleýmettik jelide tarap, kópshiliktiń qyzý talqysyna tústi, dep habarlaidy Dalanews.kz.
Informburo málimetinshe, oqiǵa Saryaǵash aýdanyndaǵy Muqaǵali Maqataev atyndaǵy mektepte tirkelgen. Videoda 11-synyp oqýshylarynyń synyp ishinde toptasyp karta oinap otyrǵany, al ózge oqýshylardyń shýlap júrgeni baiqalady.
Kadrdan alǵashqy áskeri daiyndyq pániniń muǵalimi tártipke aralaspai, telefonmen sóilesip otyrǵany kórinedi.
Oqiǵaǵa bailanysty oqýshylardyń ata-analaryna eskertý jasalǵan. Al synyptaǵy jaǵdaiǵa baqylaý jasamaǵan pedagog óz erkimen jumystan ketken.
Belgili bolǵandai, muǵalimniń bilim salasyndaǵy eńbek ótili – 13 jyl.
Jaýapty organdar atalǵan jaitqa bailanysty qyzmettik tekseris bastalǵanyn málimdedi. Tekserý qorytyndysy boiynsha mektep basshysyna da shara qoldanylýy múmkin.
"Bul jaǵdai bilim berý júiesine qoiylatyn talaptarǵa qaishy keledi. Qazirgi ýaqytta jaýapty tulǵalardyń áreketterine quqyqtyq baǵa berilip, qyzmettik tekserý júrgizilip jatyr. Kináli laýazymdy tulǵalarǵa qatysty tártiptik jáne zańda kózdelgen ózge de sharalar qabyldanady", – dep habarlady jaýaptylar.
