تۇركىستان وبلىسىندا ساباق كەزىندە كارتا ويناعان وقۋشىلاردىڭ ۆيدەوسى الەۋمەتتىك جەلىدە تاراپ، كوپشىلىكتىڭ قىزۋ تالقىسىنا ءتۇستى، دەپ حابارلايدى Dalanews.kz.

Informburo مالىمەتىنشە، وقيعا سارىاعاش اۋدانىنداعى مۇقاعالي ماقاتايەۆ اتىنداعى مەكتەپتە تىركەلگەن. ۆيدەودا 11-سىنىپ وقۋشىلارىنىڭ سىنىپ ىشىندە توپتاسىپ كارتا ويناپ وتىرعانى، ال وزگە وقۋشىلاردىڭ شۋلاپ جۇرگەنى بايقالادى.

كادردان العاشقى اسكەري دايىندىق ءپانىنىڭ ءمۇعالىمى تارتىپكە ارالاسپاي، تەلەفونمەن سويلەسىپ وتىرعانى كورىنەدى.

وقيعاعا بايلانىستى وقۋشىلاردىڭ اتا-انالارىنا ەسكەرتۋ جاسالعان. ال سىنىپتاعى جاعدايعا باقىلاۋ جاساماعان پەداگوگ ءوز ەركىمەن جۇمىستان كەتكەن.

بەلگىلى بولعانداي، ءمۇعالىمنىڭ ءبىلىم سالاسىنداعى ەڭبەك ءوتىلى – 13 جىل.

جاۋاپتى ورگاندار اتالعان جايتقا بايلانىستى قىزمەتتىك تەكسەرىس باستالعانىن مالىمدەدى. تەكسەرۋ قورىتىندىسى بويىنشا مەكتەپ باسشىسىنا دا شارا قولدانىلۋى مۇمكىن.

"بۇل جاعداي ءبىلىم بەرۋ جۇيەسىنە قويىلاتىن تالاپتارعا قايشى كەلەدى. قازىرگى ۋاقىتتا جاۋاپتى تۇلعالاردىڭ ارەكەتتەرىنە قۇقىقتىق باعا بەرىلىپ، قىزمەتتىك تەكسەرۋ جۇرگىزىلىپ جاتىر. كىنالى لاۋازىمدى تۇلعالارعا قاتىستى تارتىپتىك جانە زاڭدا كوزدەلگەن وزگە دە شارالار قابىلدانادى"، – دەپ حابارلادى جاۋاپتىلار.