Túrkistan oblysynda kómir qory jetkilikti
Túrkistan oblysynyń kúzgi-qysqy maýsymdaǵy kómir otynyna jalpy qajettiligi 1 mln 181,8 myń tonnany quraidy. Qazirgi tańda tasymaldanǵany 514,4 myń tonna (43,5%). Jetkizý jumystary aldaǵy ýaqytta tolyq aiaqtalmaq. Jalpy, jylytý maýsymynda oblysta kómir tapshylyǵy bolmaidy. Búgin bul týraly Túrkistan oblysy Óńirlik kommýnikatsiialar qyzmetinde Energetika jáne turǵyn úi-kommýnaldyq sharýashylyq basqarmasynyń bólim basshysy Igilik Turǵymbekov málimdedi.
Sonymen qatar, jalpy oblysta jylý berý merzimi – 1 qarashaǵa belgilenip otyr. Alaida mamandar ýaqytynan buryn aýa raiy sýyp ketse, jylytý maýsymy erterek bastalatynyn jetkizdi.
– Óńirdegi 2748 biýdjettik mekeme jylytý maýsymyna tolyq daiyndalyp, olarǵa qajetti 171,1 myń tonna kómir otyny jáne 5 mln. 143,7 myń litr suiyq otyn tolyq tasymaldandy. Oblystaǵy ortalyqtandyrylǵan jylýmen qamtamasyz etetin mekemelerge kómirdiń qajettiligi 108,8 myń tonna bolsa, tasymaldanǵany 43,2 myń tonna. Oblystaǵy turǵyndardyń kómirge qajettiligi – 902 myń tonna, tasymaldanǵany 301,2 myń tonna (33,4%). Tasymaldaý jalǵasýda. Temirjol stantsiiasy qoimalaryndaǵy 1 tonna kómirdiń satylý baǵasy – «Shubarkól» kómiri 14-17 myń teńge arasynda. Turǵyndar kómirdi qazirden bastap stantsiia qoimalarynan arzan baǵada satyp alǵandary durys, – dedi Igilik Ǵabituly.
Budan ózge, oblystyń mazýt otyny boiynsha qajettilik kólemi – 9,6 myń tonna. Búgingi kúnge tasymaldaýshy mekememen kelisim-shart jasalǵan. Aǵymdaǵy jyldyń qazan aiynan bastap tasymaldanbaq.
Aita keterligi, óńirdiń jylytý maýsymyna daiyndyǵyna apta saiyn jáne turǵyndardy kómir otynymen qamtamasyz etý boiynsha kún saiyn turaqty monitoring júrgizilýde.
Túrkistan oblysy Óńirlik kommýnikatsiialar qyzmeti
