Túrkistan oblysynda sáýir aiynan bastap «Úlgili aýyl» baiqaýynyń jańa kezeńi bastalady. Biylǵy erejege sáikes, aýdan ortalyqtary saiysqa qatystyrylmaidy. Bul jaiynda Túrkistan oblysynyń qoǵamdyq damý basqarmasynyń basshysy Erlan Kúzembaev brifingte málimdedi,- dep habarlaidy Dalanews.kz
Sondai-aq, baiqaý erejesine «Jomart túlek» tujyrymdamasy da engizilmek. Bul baǵyt boiynsha aýyl azamattarynyń týǵan jeri men bilim alǵan oqý ornyn abattandyrý, syrtqy kórinisin retteý, tazalyǵyn saqtaý, demeýshilik jasaý boiynsha baǵalanady.
- 2024 jyldan bastap Túrkistan oblysynda «Úlgili aýyl» baiqaýy ótkizilip keledi. Ótken jyly barlyq aýdan-qalalardan baiqaýdyń oblystyq kezeńine qatysqan eldi mekender ishinen jeńimpazdar anyqtalyp, erejege sai oblystyq biýdjetten óńirlerde biyl qurylys jumystaryn júrgizýge tiisti qarjylar qaraldy. Atap aitar bolsaq, ótken jyly jeńimpaz atanǵan Qazyǵurt aýdany, Sharbulaq aýylynda quny 500 mln teńgege - Dene shynyqtyrý jáne saýyqtyrý kesheniniń qurylysy júrgizilse, 2-orynǵa jaiǵasqan Shardara aýdanyndaǵy Kóksý aýylynda 120 mln teńgege 2 qabatty ǵimarat kúrdeli jóndeýden ótkizilip, úiirmeler ortalyǵy ashylmaq. Sondai-aq, Saryaǵash aýdanyna qarasty Mádeniet aýylynda 37,8 mln teńgege shaǵyn sport jáne balalar oiyn alańshasy, Sozaq aýdany Jartytóbe aýylynda 26 mln teńgege balalar oiyn alańynyń qurylystary jyl sońyna deiin aiaqtalyp, paidalanýǵa beriledi,- dedi basqarma basshysy.
Sonymen qatar, Erlan Baqytjanuly «Taza Qazaqstan» ekologiialyq baǵdarlama aiasynda qurylǵan «Jas Turkistan» volonterlik assotsiatsiiasynyń atqarǵan jumystarymen tanystyrdy. Uiymǵa erikti toptar men bastamashyl ujymdar biriktirilip, volonterlikti damytý baǵytynda oblysta 6 baǵyttan turatyn aýqymdy aktsiialar ótkizilgen. Nátijesinde 208 senbilik ótkizilip, sharalarǵa 200 myńǵa jýyq jas atsalysqan.
Sondai-aq, brifingte Túrkistan oblystyq energetika jáne turǵyn úi-kommýnaldyq sharýashylyq basqarmasy basshysynyń orynbasary Janádil Aitbekov «Taza Qazaqstan» baǵdarlamasy aiasynda óńirde biyl ótkiziletin is-sharalarǵa toqtaldy. Atap aitqanda, oblys aýmaǵynda 7 263 is-shara bekitilgen. Josparǵa sáikes, ár kúnde 30-40 eldi mekende tazalyq jumystary uiymdastyrylmaq. Nátijesinde aptasyna 180-200 eldi mekende senbilik sharalary júredi.
– «Taza bastaý» naýqany bastalǵaly beri josparlanǵan 7 263 is-sharanyń 528-i ótkizildi. Jalpy alǵanda, búgingi tańǵa deiin, 257 588 turǵyn belsendilik tanytyp, óz qalalary men aýyldaryn tazartýǵa úles qosty. Qala men aýyl kóshelerin tazalaýǵa 1 450 arnaiy tehnika jumyldyrylǵan. Nátijesinde 415 350 kóshet otyrǵyzylyp, 5 505 tonna qoqys shyǵaryldy,- dedi spiker.
