Túrkistan oblysynda «Jumysshy mamandyqtar jylyn» ótkizý jónindegi óńirlik jospar bekitildi. Óńirlik jospar 7 baǵyt, 64 qadamnan turady. Bul týraly Túrkistan oblysy bilim basqarmasy basshysynyń orynbasary Aigúl Qasymbekova málimdedi, - dep habarlaidy Dalanews.kz Túrkistan oblysynyń Óńirlik kommýnikatsiialar qyzmetine silteme jasap.
«Jumysshy mamandyqtar jylyn ótkizý aiasynda salalyq basqarmalar, aýdandyq jáne qalalyq ákimdikter men tehnikalyq, kásiptik bilim berý uiymdarynyń birlesken jumystary júzege asyrylmaq. Jalpy oblysta 50 kolledj jumys isteidi. Olardyń basym bóligi kópsalaly kolledjder. Onyń ishinde, aýylsharýashylyq salasy mamandaryn – 10, qyzmet kórsetý jáne týrizm salasy mamandaryn – 3, al qurylys salasy boiynsha mamandardy – oblystaǵy 11 kolledj daiarlaidy. Búgingi tańda 75 mamandyq boiynsha 45 stýdent bilim alyp jatyr. Sondai-aq, 30 kolledjde jumysshy mamandar daiarlanady, stýdentter sany 16 100-di quraidy. 2024-2025 oqý jylynda 15 525 memlekettik tapsyrys bolsa, onyń ishinde 8 678-i – jumysshy mamandyqtar. Al, 2025-2026 oqý jylyna 15 500 memlekettik tapsyrys josparlanǵan, onyń ishinde jumysshy mamandyqtarynyń sanyn 9 500-ge ulǵaitýdy josparlap otyrmyz. Biyl «Bir kolledj-bir ónim» dep atalatyn jobany engize otyryp, 5 kolledjdiń bazasynda tsehtar ashyp, kishi kásiporyndarǵa ainaldyrý jumysyn júrgizýdemiz. Bilikti jumysshy maman daiyndaýdyń joly - dýaldy oqytý júiesi qolǵa alynǵan. Búgingi tańda 35 kolledjde dýaldy oqytý júiesimen 64 mamandyq boiynsha 10 353 bilim alýshy qamtylǵan»,- dedi spiker.
Aigúl Erǵaliqyzynyń sózinshe, biyl «Mamandyqtar atlasy» daiarlanady. Sondai-aq, investorlar men kásiporyndardyń suranysy negizinde jańa mamandyqtardy ashý boiynsha jumystar júrgizilmek. Onyń ishinde lift jáne eskalator, jyljymaityn múlikti basqarý, et jáne et ónimderin óndirý, agrohimiia, pilotsyz ushý apparattary, maqta shitin óńdeý jáne jip iirý, vagon jóndeý slesary, jasyl energetika, gidrotehnikalyq qurylys mamandyqtary bar.
Sondai-aq, brifingke qatysqan oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Nurjan Nurashovtyń sózinshe, óńirde eńbekke qabiletti 850 myń adam bar. Onyń ishinde, 200 myń adam jumysshy mamandyǵy boiynsha jumys isteidi. Sondai-aq, bekitilgen ulttyq kásibi klassifikatorda 1 270 mamandyq toby jáne 12 185 mamandyq pen qyzmet túrleri engizilgen.
«2025 jylǵa «Óńirlik jumyspen qamtý kartasy» bekitilip, 130 769 jumys ornyn ashý josparlanyp otyr. Sondai-aq, biyl «Ulttyq jobalar» aiasynda júzege asyrylatyn 375 joba sheńberinde 4 074 jumys ornyn ashý kózdelýde. «Eńbek» baǵytyndaǵy bos jumys oryndary boiynsha ashylatyn 57 221 jumys orny men 32 448 sýbsidiialanǵan jumys orny boiynsha da jumysshy mamandyqtarǵa basymdyq beriledi. Sonymen qatar, oblysta biyl 125 investitsiialyq joba negizinde 2004 jumys ornyn ashý kózdelgen. Búginde jańa jumys oryndaryna joldanatyn azamattardy qysqa merzimdik kásiptik oqytýdan ótkizý úshin jeke investorlarmen memorandýmdar túzilip jatyr. Budan bólek, 2025 jyly 32 448 adamdy ýaqytsha sýbsidiialanatyn jumys oryndaryna joldaý josparlanýda»,- dedi spiker.
Aita keteiik, oblysta biyl bos jumys oryndary jármeńkeleri men óndiris oryndarynda ashyq esik kúnderin ótkizý josparlanǵan. Atalǵan jármeńkelerde 350-ge jýyq jumys berýshilerden 1500-den astam bos jumys oryndary usynylýda. Bos jumys oryndarynyń 57 paiyzy jumysshy mamandyqtarǵa tiesili.
