Túrkistan oblysyndaǵy jaǵa ustatar jait boldy. 16 jasaǵy qyzdy alyp qashyp, zorlap, kelin qylyp qoiǵan, dep habarlaidy Dalanews.kz.
Bul oqiǵa jóninde #NeMolchiKZ qozǵalysy habarlady. 2023 jyly 20 jastaǵy jigit kámeletke tolmaǵan qyzben tanysyp, ony aldap kólikpen Shymkentke aparǵan. Telefonyn tartyp alyp, týystaryna “endi ol Iqan aýylynda kelin” dep habar jibergen. Keiin qyzdy zorlaǵan. Artynsha zorlyqtyń barlyq belgisin joiǵan.
Qyzdyń ata-anasy dereý izdeýge kirisip, aýylǵa barǵan. 70 jastan asqan ákesine álgi jigit aýlada shabýyl jasaǵan. Aiqai-shý kóterilgennen keiin týystary qyzdy alyp ketip, politsiiaǵa júgingen.
Alaida tergeýshi, prokýror jáne tergeý bóliminiń orynbasary qariiaǵa “qyzyń óz erkimen turmysqa shyqqysy keledi, kelin boldy” dep túsindirgen. Qyzdyń nebári 16 jasta bolǵanyna qaramastan, sheneýnikter “ata-anasy kelisim berdi” degen syltaýmen isti “nomenklatýraǵa” jiberip, iaǵni qozǵamai qoiǵan.
Úsh aidan keiin kolledjden qońyraý shalǵan soń ata-anasy qyzyn úiine qaitaryp alǵan. Sebebi “kúieýi” oǵan sabaqqa barýǵa tyiym salǵan, al stipendiiasyn ózine alyp otyrǵan.
Kolledj psihology qyzǵa zorlyq-zombylyq kórsetilgenin, qorlanyp, oqýǵa jiberilmegenin anyqtaǵan. Kúieýi politsiiaǵa aryz túsken soń 3 million teńge “tatýlasý úshin” tólegenine ashýlanyp, qyzdy sabaǵan.
Qyzdyń ákesi – 72 jasta, 15 balanyń ákesi. Ol 2023 jyldan beri barlyq memlekettik organǵa shaǵymdanyp, ádildik izdep keledi. Qariia politsiia men prokýratýra qyzmetkerleri isti jasyryp, ózderin aldaǵanyn aitady.
"NeMolchiKZ" uiymynyń málimetinshe, tergeýshi qyzdyń zorlanǵanyn dáleldeitin saraptama qorytyndysy men aryz bola tura isti jaýyp tastaǵan. Bul jaǵdai kelisim men sybailas jemqorlyqtyń belgisi deidi belsendiler.
Advokattar bul iske qatysty Shymkent qalalyq prokýratýrasyna jáne Bas prokýratýraǵa shaǵym túsirgen.
Belsendiler zorlaýshyny jáne oǵan kómektesken sheneýnikterdi jaýapqa tartýdy talap etip otyr.
Qazirgi tańda is qaita qozǵaldy. Belsendiler Ádilet ministriniń orynbasary Zakiia Dinarany bul isti jeke baqylaýǵa alýǵa shaqyrdy.
