El birligin bekemdegen jıyn aldymen Qazyǵurt aýdanynda uıymdastyryldy. Semınarǵa Túrkistan oblysy prokýrorynyń orynbasary Saıan Keldibekov, Qazyǵurt aýdanynyń ákimi Arman Abdýllaev, QR UQK Túrkistan oblystyq departamenti bastyǵynyń orynbasary Bahtıar Mametbakıev, Túrkistan oblysy Polısıa Departamenti Jergilikti polısıa qyzmeti basqarmasynyń bastyǵy Asylhan Tórehanov qatysty. Sondaı-aq jıynda UQK-niń Túrkistan oblysy boıynsha departamentiniń, quqyq qorǵaý organdarynyń ókilderi, jergilikti atqarýshy bıliktiń ıdeologıa boıynsha jaýapty qyzmetkerleri, belgili ǵalymdar, sarapshylar boldy.
Semınarǵa moderatorlyq etken Túrkistan oblystyq qoǵamdyq damý basqarmasynyń basshysy Ańsar Óserbaev basqosýdyń mańyzdylyǵyna toqtalyp, kún tártibindegi máselelermen tanystyrdy.
– Memleket basshysy Qasym-Jomart Toqaev óz Joldaýynda el birligin nyǵaıta túsý qajettigine aıryqsha mán berdi. Bul baǵytta quqyq qorǵaý jáne jergilikti atqarýshy organdarǵa artylatyn senim júgi aýyr. Biz birlese atqarǵan jumystar arqyly qoǵamnyń tatýlyǵy men birligin, qoǵamnyń qaýipsizdigi men tynyshtyǵyn qamtamasyz ete alamyz. Áleýmettik jáne etnosaralyq qaqtyǵystardy eńserý, olardyń aldyn alý men boldyrmaý jónindegi jumys bizdiń qyzmetimizdiń negizgi baǵyttarynyń biri bolyp qala beredi. Ol siz ben bizge ortaq mindet dep bilemin. Sol úshin de kúsh salyp, birlese jumys jasaýǵa shaqyramyn, – dedi Ańsar Jańabaıuly.
Semınarda Q.A.Iasaýı atyndaǵy HQTÝ-niń teologıa fakúltetiniń dekany f.ǵ.d, profesor Dosaı Kenjetaı, QR UQK Túrkistan oblysy boıynsha departamentiniń basqarma basshysy Janǵalı Ýrýnbaev, OQMPÝ-dyń «Rýhanı jańǵyrý» jáne tárbıe bólimi basshysy, tarıh ǵylymdarynyń kandıdaty Qaırat Anarbaev baıandama jasady. Baıandamalar oqylyp bolǵan soń, usynystar men pikirler tyńdaldy.
Mańyzdy semınar Qazyǵurttan soń Ordabasy aýdanynda jalǵasty. Onda etnosaralyq tatýlyqty saqtaý, qoǵamdyq kelisimdi nyǵaıtý, daý-damaıdyń aldyn alý baǵytynda keleli oılar aıtyldy.
Semınardy qorytyndylaǵan oblystyq qoǵamdyq damý basqarmasynyń basshysy Ańsar Óserbaev óńirdegi etnosaralyq shıelenistiń aldyn alýǵa negizdelgen is-sharalar turaqty túrde jalǵasatyndyǵyn aıtyp, bul baǵyttaǵy jumystardy birlese atqarýǵa shaqyrdy.
