ەل بىرلىگىن بەكەمدەگەن جيىن الدىمەن قازىعۇرت اۋدانىندا ۇيىمداستىرىلدى. سەمينارعا تۇركىستان وبلىسى پروكۋرورىنىڭ ورىنباسارى سايان كەلدىبەكوۆ، قازىعۇرت اۋدانىنىڭ اكىمى ارمان ابدۋللايەۆ، ق ر ۇقك تۇركىستان وبلىستىق دەپارتامەنتى باستىعىنىڭ ورىنباسارى باحتيار مامەتباكييەۆ، تۇركىستان وبلىسى پوليسيا دەپارتامەنتى جەرگىلىكتى پوليسيا قىزمەتى باسقارماسىنىڭ باستىعى اسىلحان تورەحانوۆ قاتىستى. سونداي-اق جيىندا ۇقك-نىڭ تۇركىستان وبلىسى بويىنشا دەپارتامەنتىنىڭ، قۇقىق قورعاۋ ورگاندارىنىڭ وكىلدەرى، جەرگىلىكتى اتقارۋشى بيلىكتىڭ يدەولوگيا بويىنشا جاۋاپتى قىزمەتكەرلەرى، بەلگىلى عالىمدار، ساراپشىلار بولدى.
سەمينارعا مودەراتورلىق ەتكەن تۇركىستان وبلىستىق قوعامدىق دامۋ باسقارماسىنىڭ باسشىسى اڭسار وسەربايەۆ باسقوسۋدىڭ ماڭىزدىلىعىنا توقتالىپ، كۇن تارتىبىندەگى ماسەلەلەرمەن تانىستىردى.
– مەملەكەت باسشىسى قاسىم-جومارت توقايەۆ ءوز جولداۋىندا ەل بىرلىگىن نىعايتا ءتۇسۋ قاجەتتىگىنە ايرىقشا ءمان بەردى. بۇل باعىتتا قۇقىق قورعاۋ جانە جەرگىلىكتى اتقارۋشى ورگاندارعا ارتىلاتىن سەنىم جۇگى اۋىر. ءبىز بىرلەسە اتقارعان جۇمىستار ارقىلى قوعامنىڭ تاتۋلىعى مەن بىرلىگىن، قوعامنىڭ قاۋىپسىزدىگى مەن تىنىشتىعىن قامتاماسىز ەتە الامىز. الەۋمەتتىك جانە ەتنوسارالىق قاقتىعىستاردى ەڭسەرۋ، ولاردىڭ الدىن الۋ مەن بولدىرماۋ جونىندەگى جۇمىس ءبىزدىڭ قىزمەتىمىزدىڭ نەگىزگى باعىتتارىنىڭ ءبىرى بولىپ قالا بەرەدى. ول ءسىز بەن بىزگە ورتاق مىندەت دەپ بىلەمىن. سول ءۇشىن دە كۇش سالىپ، بىرلەسە جۇمىس جاساۋعا شاقىرامىن، – دەدى اڭسار جاڭاباي ۇلى.
سەميناردا ق.ا.ياساۋي اتىنداعى ءحقتۋ-نىڭ تەولوگيا فاكۋلتەتىنىڭ دەكانى ف.ع.د، پروفەسسور دوساي كەنجەتاي، ق ر ۇقك تۇركىستان وبلىسى بويىنشا دەپارتامەنتىنىڭ باسقارما باسشىسى جانعالي ۋرۋنبايەۆ، وقمپۋ-دىڭ «رۋحاني جاڭعىرۋ» جانە تاربيە ءبولىمى باسشىسى، تاريح عىلىمدارىنىڭ كانديداتى قايرات اناربايەۆ بايانداما جاسادى. باياندامالار وقىلىپ بولعان سوڭ، ۇسىنىستار مەن پىكىرلەر تىڭدالدى.
ماڭىزدى سەمينار قازىعۇرتتان سوڭ ورداباسى اۋدانىندا جالعاستى. وندا ەتنوسارالىق تاتۋلىقتى ساقتاۋ، قوعامدىق كەلىسىمدى نىعايتۋ، داۋ-دامايدىڭ الدىن الۋ باعىتىندا كەلەلى ويلار ايتىلدى.
سەميناردى قورىتىندىلاعان وبلىستىق قوعامدىق دامۋ باسقارماسىنىڭ باسشىسى اڭسار وسەربايەۆ وڭىردەگى ەتنوسارالىق شيەلەنىستىڭ الدىن الۋعا نەگىزدەلگەن ءىس-شارالار تۇراقتى تۇردە جالعاساتىندىعىن ايتىپ، بۇل باعىتتاعى جۇمىستاردى بىرلەسە اتقارۋعا شاقىردى.
