Túrkistan oblysynyń aýdan, qala ákimdikteri men basqarmalardyń jumysyn baǵalaý maqsatynda arnaiy reitingti esepteý júiesi ázirlendi,- dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Sonymen birge memlekettik satyp alý salasyndaǵy josparlardyń oryndalýyna da qadaǵalaý kúsheitiledi. Atalǵan máseleler oblys ákimi apparatynyń aptalyq májilisinde talqylandy. Túrkistan oblysynyń ákimi Nuralhan Kósherov jaýapty basshylarǵa óz mindetterin ýaqtyly ári sapaly atqarý mindet ekenin qaperlerine saldy.
"Aýdan, qala ákimderi men basqarma basshylarynyń jumys qarqyny turaqty túrde qadaǵalanady. Indikatorlardyń oryndalýyn apparat májilisterinde júieli talqylaimyz. Sondyqtan aýdan, qala ákimderi osy máseleni nazarda ustap, indikatorlardyń tolyq oryndaýǵa kúsh salsyn. Indikatorlardy taǵy da zerdelep, qajetti tarmaqtardy qosyńyzdar. Barlyq sala túgel qamtylýy tiis. Memlekettik satyp alý protsesterin ýaqtyly júzege asyrýdy tapsyramyn. Sylbyrlyqqa jol bergenderdiń jaýapkershilikteri qaralady. Biýdjettiń múmkindigin, qurylys jumystarynyń mańyzdylyǵy men ekonomikalyq tiimdiligin eskerip, ár jobany ádil ári naqty baǵalaý qajet. Artyq qarjy jumsaýǵa jol berilmeidi", – degen Nuralhan Kósherov ekonomikalyq kórsetkishi tómen ári memlekettik satyp alý protsesinde kemshilik anyqtalǵan basqarma basshylary men aýdan, qala ákimderiniń esebin tyńdap, tiisti tapsyrmalar berdi.
Májiliste Oblystyq ekonomika jáne biýdjettik josparlaý basqarmasynyń basshysy Qanat Qaiypbek pen Túrkistan oblysynyń memlekettik satyp alý basqarmasynyń basshysy Nurlan Amanqulovtyń esepteri tyńdaldy.
Óńirde negizgi ekonomikalyq kórsetkishter jaqsarǵan. Oń dinamika bar. Osy qarqyndy túsirmeý úshin aýdan qala ákimderi qyzmetiniń tiimdiligin baǵalaityn 67 kórsetkish ázirlendi. Kórsetkishterdiń mańyzdylyǵyn eskerilip, ol 9 blokqa jinaqtalǵan. Baǵalaý júiesindegi 67 kórsetkishtiń 2-eýi oblys deńgeiinde qalyptasady. Ásirese, óndiris oryndaryn ashý, ónerkásipti damytý, ishki kiristerdi ulǵaitý baǵyttaryna basymdyq beriledi. Ekonomikalyq damý indikatory ai saiyn esepteletin bolsa, barlyq 9 indikator boiynsha aýdan qala ákimderiniń reitingi toqsan saiyn shyǵarylady.
