Onyń aitýynsha, departament ótken jyly áleýmettik qorǵaý salasy boiynsha 158 783 memlekettik qyzmet kórsetken. Qoljetimdi orta qalyptastyrý boiynsha 94 baqylaý júrgizilip, nátijesinde 38 laýazymdy tulǵaǵa ákimshilik aiyppul salynǵan.
– Statistikalyq málimetterge sáikes, 2022 jyldyń 1 qańtary boiynsha oblysta múgedektigi bar adamdardyń sany 96 748-di qurady. Bul oblys halqy sanynyń 4,7%-y, al respýblika boiynsha jalpy múgedekter sanynyń 13,8%-n quraidy. 2021 jyly 6 139 adamǵa alǵashqy ret múgedektik rásimdelgen. Ótken jyly oblys kóleminde ońaltý tehnikalarymen jáne áleýmettik qyzmetpen 50 myńǵa jýyq azamat qamtamasyz etildi. Biyl Departament tarapynan erekshe qajettilikteri bar adamdar úshin beiimdelgen 516 nysandy qurylys normalary standart talaptaryna sáikestigine tekserý-baqylaý jumystaryn júrgizý kózdelgen, – dedi Rýslan Káribaiuly.
Sonymen qatar, brifingke qatysqan departamenttiń meditsinalyq-áleýmettik saraptama máseleleri jónindegi basshy orynbasary Ernar Aidarbekulynyń aitýynsha, ótken jyly tolyq ońaltýdan ótken múgedekterdiń sany 1 190 adamdy quraǵan. Jańa zańǵa sáikes, 7 jastan 16 jasqa deiingi múgedek balalarǵa múgedektik tobyn taǵaiyndaý normasy engizildi jáne alatyn járdemaqy mólsheri de ósken. Odan bólek, buryn múgedektigi bar balalar ata-anasynan aiyrylǵan jaǵdaida óz járdemaqysyn nemese asyraýshysynan aiyrylý jaǵdaiy boiynsha járdemaqynyń bireýin ǵana alyp otyratyn. Al, engizilgen ózgeristerge sáikes, eki járdemaqy da tólenedi.
Oǵan qosa, departament basshysynyń áleýmettik máseleleri jónindegi orynbasarynyń mindetin ýaqytsha atqarýshy Janat Jamahova 2022 jyldyń 1 qańtarynan bastap eń tómengi zeinetaqy 46 302 teńgeni quraitynyn aitty. Azamattardyń zeinetaqy mólsherin esepteýde ailyq tabysy bolmaǵan jaǵdaida er azamattarǵa 25 jyl, áielderge 20 jyl eńbek ótili bolǵan jaǵdaida eń tómengi zeinetaqy mólsheri taǵaiyndalady.
