Túrkistan oblysynda 4 myńǵa jýyq azamat kásipkerlik kýrsynan ótedi
Túrkistan oblysynda «Atameken» Ulttyq kásipkerler palatasy azamattarǵa kásipkerlik negizin úiretýdi qolǵa aldy. «Bastaý Biznes» jobasy aiasynda oqý kýrsyna jalpy elimizde 10 733 adam ótinish bildirse, onyń 1317-si óńirimizge tiesili, – dep habarlaidy Dalanews.kz Túrkistan oblysynyń Óńirlik kommýnikatsiialar qyzmetine silteme jasap.
Josparǵa sai respýblika boiynsha 30 myń adamdy oqytý kerek bolsa, onyń 4 myńǵa jýyǵy Túrkistan oblysynan. Bul týraly Túrkistan oblysy kásipkerler palatasy direktory Timýr Naqypbekov málimdedi.
– Úmitkerler atameken.com saity arqyly testileýden ótedi. Keiin olarǵa 12 modýlden turatyn beine sabaqtar usynylady. Olardyń arasynda tabysty kásipkerdiń oilaýy men daǵdylary, biznes-ideiany tańdaý, biznes-josparlaý, marketingtik zertteý, qarjylyq saýattylyq, biznesti quqyqtyq súiemeldeý, salyq salý jáne taǵy basqa taqyryptar qamtylady. Oqýdy sátti aiaqtaǵan tyńdaýshylar memleketten 200 AEK kóleminde grant alý baiqaýyna qatysýǵa múmkindik beretin sertifikat alady. Sondai-aq, 2017-2021 jyldarǵa arnalǵan «Eńbek» baǵdarlamasy aiasynda óz jobalaryn 6% jeńildikpen qarjylandyrý múmkindigi bar, – dedi T.Naqypbekov.
Tyńdaýshy sońǵy testileýdiń qorytyndysymen 12 ball (60%-dan joǵary) jinasa, oǵan biznes-jospar konstrýktory ashylady. Biznes-jospar balldyq júiemen baǵalanady. 18 ball jinalsa (60%-dan joǵary) qatysýshy sertifikat alady. Eger qatysýshy testileý boiynsha shekti balldy jinai almasa, ol testileýden qaitadan óte alady. Mundai múmkindik úsh ret beriledi.
Aita keteiik, Jumyspen qamtý ortalyǵy beretin joldama 30 kúntizbelik kúnge deiin jaramdy. Demek, alǵashqy lekke úlgermegen úmitkerler kelesi lekke jazylýǵa múmkindik alady. Ekinshi lekke tirkeý 17 mamyrda, úshinshi lekke 14 maýsymda, tórtinshi lekke 12 shildede, besinshi jáne altynshy lekterge 9 tamyz ben 6 qyrkúiekte bastalady.
