Túrkistan oblysynda jol qurylysy men jóndeý jumystarynyń sapasy qatań baqylaýda tur. Osy oraida, oblys ákiminiń birinshi orynbasary Zulpyhar Joldasovtyń tóraǵalyǵymen kezekti shtab otyrysy ótip, kún tártibinde 4 másele qaraldy. Atap aitsaq, jol salasyndaǵy máseleler, oblys aýmaǵyndaǵy joldardyń sapasy, respýblikalyq jáne oblystyq mańyzy bar avtomobil joldarynda atqarylyp jatqan jumystar talqylandy, dep habarlaidy Dalanews.kz
Jiyn barysynda jol salasyna jaýapty merdiger mekemeler men aýdan, qala ákimdikterine naqty tapsyrmalar berildi. Óńirdegi keibir jol nysandarynda sapa talaptarynyń saqtalmai jatqany aitylyp, qatań eskertý jasaldy. Sonymen qatar, oblystyq jolaýshylar kóligi jáne avtomobil joldary basqarmasyna monitoring jumystaryn kúsheitý júkteldi.
Oblys ákiminiń birinshi orynbasary barlyq merdiger uiymdar men tiisti mekemelerdi jol sapasyn qalpyna keltirýdi mindettep, ýaqyt berdi.
– Jol qurylysyna jaýapty ár mekeme óz jumysyna nemquraily qaramaýy tiis. 1 maýsymǵa deiin kemshilikterdi qalpyna keltirip, sapasyz joldardy jóndeńizder. Mindetterdi oryndamaǵan jaýaptylarǵa zań aiasynda tiisti sharalar qabyldanady», – dedi Zulpyhar Sansyzbaiuly.
Túrkistan oblysynyń aýdan, qalalaryndaǵy jol sapasyna monitoring jasalyp, taldaý qorytyndysymen jol jamylǵysynyń sapasy boiynsha birqatar kemshilik anyqtaldy. Jol sapasy syn kótermeitin aýmaqtarǵa jaýaptylar qatarynda 30-dan astam kompaniia bar. Monitoring anyqtaǵan aýmaqtar ishinde Túlkibas, Sairam, Otyrar, Saýran, Jetisai, Maqtaaral, Shardara, Ordabasy, Báidibek aýdandary men Túrkistan, Kentaý jáne Arys qalalaryndaǵy joldar tirkelgen.
Oblys ákimdigi jol infraqurylymynyń sapasyn arttyrý baǵytynda júieli jumystar júrgizýdi jalǵastyrady. Anyqtalǵan kemshilikterdi joiý sharalary jiti baqylaýǵa alynǵan.
