Túrkistan oblysynda 210 úmitker aýyl ákimi sailaýyna qatysady
Onyń ishinde 83 úmitker – saiasi partiialar, 127 úmitker – ózin-ózi usynǵandar. Tirkeý jumystary aiaqtala sala úmitkerlerdiń úgit-nasihat jumystary bastalyp ketti.
23 shilde kúni nasihat jumystary aiaqtalyp, 25 shilde aýyl ákimderin sailaýdyń alǵashqy kezeńi bastalady. Bul týraly Túrkistan oblystyq aýmaqtyq sailaý komissiiasynyń tóraǵasy Álibek Ómiráliev málimdedi.
Onyń aitýynsha, sailaý kezinde 60 aýyl okrýgte 241 ýchaskede daýys beriletin bolady.
– Barlyq tirkelgen 210 úmitkerdiń ishinde 10-y (4,7%) áiel adam. Ortasha jas – 45 jas, eń jas úmitker – 27 jasta. Usynylǵandardyń 31-i — qyzmettegi ákim, 74-i — memlekettik qyzmette, 19-y — kommertsiialyq saladaǵy ókilder, 70-i — biýdjettik saladaǵy qyzmetkerler, 1 adam — jumyssyz. Eń kóp sailaýshylar sany Keles aýdany, Abai aýyl okrýginde – 12 655 adam. Eń az sailaýshylar Saryaǵash aýdany, Álimtaý aýyldyq okrýginde – 805 adam. Úmitkerlerdiń eń kóp tirkelgen sailaý okrýgi – Saryaǵash aýdanyndaǵy Qurkeles aýyldyq okrýginde, – dedi Álibek Kádenuly.
