12 mamyr kúni Meiirgerler kúnine orai, Túrkistan qalasynda «Meiirger qyzmetin damytýdyń innovatsiialary men perspektivalary» atty halyqaralyq forým ótti. Jiynda meiirgerlerdiń qaltqysyz qyzmeti men olardyń jumysyn jandandyrý baǵytynda atqarylyp jatqan jumystar men aldaǵy josparlar talqylandy, dep habarlaidy Dalanews.kz
Búgingi tańda oblysta 19 131 meiirger bar, iaǵni 10 myń turǵynǵa shaqqanda qamtylýy - 88,8%. 2023 jyly eki meiirger Finliandiiada oqyp kelse, 2024 jyly 234 meiirbike Astana qalasynda biliktiligin arttyryp, sheteldik ozyq tájiribeni jergilikti meditsinada qoldanýǵa múmkindik aldy.
Densaýlyq saqtaý salasynda bilikti kadrlardy daiarlaý ózektiligi arta túsýde. Osy turǵyda meditsinalyq kolledjderdiń róli erekshe.
Túrkistan oblysynda eki memlekettik, Túrkistan jáne Jetisai joǵary meditsinalyq kolledjderi jumys isteidi. Onda 3 myńnan astam stýdent bilim alýda. Kolledjderde 246 oqytýshy qyzmet atqarady. Bul oqý oryndary halyqaralyq standarttarǵa sai akkredittelgen, memlekettik attestatsiiadan sátti ótken. Túlekterdiń jumysqa ornalasý kórsetkishi de joǵary.
2023-2024 jyldardaǵy oqý jylynda Jetisai joǵary meditsinalyq kolledjiniń jumysqa ornalasqan túlekteriniń úlesi 72% qurasa, Túrkistan joǵary meditsinalyq kolledjinde bul deńgei 78,6% kórsetken. Bul - túlekterdiń eńbek naryǵynda suranysqa ie jáne básekege qabiletti ekenin kórsetedi.
Oqý oryndary qala men oblys boiynsha 56 meditsinalyq mekememen kelisim jasaǵan. Oqý bazalarynda simýliatsiialyq trening, klinikalyq sabaq ótkizilip, mentorlyq júie engizilgen. Sonymen qatar, kolledjderde «Meiirbike isi», «Emdeý isi», «Akýsherlik is» mamandyqtary boiynsha qosymsha bilim berý bólimderi jumys isteidi.
