Teriskeige byltyr qonys aýdarǵan 2 129 adamnyń ishinde 41,7% (889 adam) Soltústik Qazaqstan oblysyna kóshti. Sonymen birge túrkistandyqtar Pavlodar, Qostanai, Shyǵys Qazaqstan oblystaryna, Qaraǵandy, Abai oblysyna jáne Ulytaý oblystaryna kóshken. Soltústik óńirlerge qonys aýdarýǵa niet bildirgender sany artyp otyr.
Elimizde birneshe jyldan beri júzege asyp kele jatqan «Eńbek» baǵdarlamasynyń maqsaty – halqy tyǵyz ornalasqan Ońtústiktegi oblystardyń turǵyndaryn jumys kúshi jetispeitin Soltústik óńirlerge qonystandyrý.
Osy baǵdarlama qolǵa alynǵan 2015 jyldan beri Túrkistan oblysynan jalpy 10 myńǵa jýyq múshesi bar 5 myńdai otbasy teriskeige qonys aýdarǵan.
Qonys aýdarǵan eńbekke qabiletti turǵynnyń basym bóligi turaqty jumyspen qamtylsa, qalǵany jeke kásibin ashqan. Óz kásibin ashamyn deýshilerge egin, mal sharýashylyǵymen shuǵyldanýǵa jer telimderi, bos turǵan ǵimarattar usynylǵan. Baspana boiynsha kómek kórsetilgen.
Sondai-aq, kóship-qonýǵa bailanysty memleket tarapynan qarjylai kómek berilgen. «Eńbek» baǵdarlamasynyń strategiialyq mańyzy joǵary. Jańa mekenge baryp, jańa ómir bastaýǵa, Qazaqstandy órkendetýge túrkistandyq árbir turǵynnyń múmkindigi bar.
Eske salsaq, 2021 jyly «AMANAT» partiiasy Túrkistan oblystyq partiia filialy jáne oblystyq Jumyspen qamtýdy úilestirý jáne áleýmettik baǵdarlamalar basqarmasynyń uiymdastyrýymen, osy baǵytty nasihattaýshy J.Aǵabekovtiń demeýshiligimen Saryaǵash jáne Sairam aýdandarynan 30 otbasy Pavlodar oblysyna attanyp, tynys-tirshiligimen tanysyp qaitty. Bul jospar aldaǵy ýaqytta da jalǵasady.
