Túrkistan oblysynda 25 myń agroqurylym maqta sharýashylyǵymen aınalysady. 2024 jyly 106,4 myń gektarǵa maqta daqyly egilip, jalpy egistiktiń 12 paıyzyn qurady, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Kúzgi jıyn-terim barysynda týyndaǵan máselelerdi der kezinde sheshý jáne taýar óndirýshiler arasynda aqparattyq túsindirý sharalaryn júrgizý úshin oblys ákimi Darhan Satybaldy arnaıy jumys tobyn jasaqtap, jaǵdaıdy turaqty baqylaýyna aldy.
Oblys ákiminiń orynbasary Nurbol Turashbekov Jetisaı jáne Maqtaaral aýdanynyń sharýalarymen kezdesip, alqaly májilis ótkizdi.
Aýyl sharýashylyǵy basqarmasynyń basshysy Nurbek Badyraqov memlekettik qoldaý aıasynda qarjylardyń basym bóligi maqta sharýashylyǵyn damytýǵa baǵyttalǵanyn aıta kele, baǵdarlamalar boıynsha atqarylǵan jumys esebin usyndy.
Maqta zaýyttarynyń ókilderi men sharýalar kúrmeýli máselelerin ortaǵa salyp, usynystaryn jetkizdi. Maqta qabyldaý beketteriniń jumysyn júıeleý, maqtany suryptaı otyryp baǵalaý, sý únemdeý tehnologıasyn endirýge qatysty suraqtarǵa jaýap bere otyryp Nurbol Turashbekov:
– Maqtanyń baǵasy túspeý úshin ózderińizben birge onyń sapasyn arttyrýǵa kúsh salýymyz kerek. Usynystaryńyz oryndy, egiletin maqta tuqymyna kóńil bólý kerek. Bul baǵyttaǵy ákimdik tarapynan qolǵa alynǵan bastamalar eń aldymen sharýashylyqtardyń múddesin kózdeıtinin atap ótkim keledi, – dedi ol.
Qazirgi tańda ákimdik tarapynan maqta óńdeýshi zaýyt basshylarynyń jáne qoǵamdyq uıymdardyń kelisimderimen, sondaı-aq qoǵamdyq uıym belsendilerin qatystyra otyryp arnaıy mobıldi jumys toby quryldy. Mobıldi top arqyly qyrkúıek aıynda baqylaý júrgizilip, maqta óńdeý zaýyttarynyń maqta qabyldaý beketterindegi zerthanalar men tarazylar tolyq sertıfıkattaýdan ótkizildi.
