Atalǵan jumysshy toptyń quramyna oblystyq máslihat depýtattary, bailanys operatorlary, jaýapty basqarma ókilderi enip, keshe ekinshi otyrysyn ótkizdi. Jiyndy «Nur Otan» partiiasy Túrkistan oblystyq filialy tóraǵasynyń birinshi orynbasary, fraktsiia jetekshisi Beisen Tájibaev júrgizip otyrdy. Maqsat – problemalardy aiqyndap, sheshý jolyn qarastyrý, tiisti basqarma men jaýapy mekemelerge usynys berý.
Jiynda Túrkistan oblysynyń tsifrlandyrý, memlekettik qyzmetter kórsetý jáne arhivter basqarmasy basshysy orynbasary Erlan Ianabaevtyń habarlamasy tyńdaldy. Onyń aitýynsha, oblystaǵy 838 eldi mekenniń 481-inde, iaǵni, 57,3 paiyzynda 3G jáne 4G mobildi internetteri bar. 206 aýyldyq eldi meken 2G júiesine qanaǵat bildirse, 151 aýylda (18,1%) mobildi bailanys bolmai tur. Oblystaǵy 6596 shaqyrymǵa jetetin respýblikalyq, oblystyq, aýdandyq jáne qalalyq mańyzy bar avtojoldardyń 3400 shaqyrymynda uialy bailanys nashar jáne joq.
– Oblys aýmaǵynda uialy bailanys operatorlary usynatyn qyzmetter óńir halqynyń qajettilikterine jaýap bermeidi. QR Tsifrlyq damý, innovatsiialar jáne aeroǵarysh ónerkásibi ministrligi men bailanys operatorlary arasyndaǵy memorandým sheńberinde 2020 jyldyń sońyna deiin «Ksell» aktsionerlik qoǵamy tarapynan 250-den astam turǵyndary bar 80 aýyldyq eldi-mekenderdi 3G nemese 4G standartymen mobildik internetpen qamtamasyz etý júktelgen bolatyn. Alaida 58 eldi meken ǵana mobildi keń jolaqty qoljetimdilikpen qamtyldy, – degen ol aýyl turǵyndaryna mobildik internetten bólek joǵary jyldamdyqty internetpen qamtamasyz etý maqsatynda qolǵa alynǵan jumystardy baiandady. Qazaqstanda alǵashqy bolyp bizdiń oblysta «Qazaqtelekom» jáne «Transtelekom» aktsionerlik qoǵamdary tarapynan memlekettik-jekeshelik áriptestik jobasy boiynsha talshyqty-optikany paidalaný jobasy iske asyryla bastaǵan.
Telekommýnikatsiialar komitetiniń Shymkent qalasy jáne Jambyl, Túrkistan, Qyzylorda oblystary boiynsha óńiraralyq bailanys inspektsiiasynyń basshysy Erjan Toqtaǵulov pen ózge de jaýapty mekeme ókilderiniń habarlamalary tyńdaldy. Oblystyq máslihat depýtattary turǵyndar sapaly internetke muqtaj bolyp otyrǵanyn aityp, máseleni jedel sheshý kerektigin jetkizdi.
Jiyn qortyndysy boiynsha fraktsiia músheleri men bailanys salasyna jaýapty mekeme ókilderinen quralǵan jumysshy top Túlkibas aýdanyndaǵy Sastóbe kenti men Keltemashat aýyl okrýginde bolyp, uialy bailanys sapasyn tekserýden ótkizdi. Endi jumysshy top bekitilgen josparǵa sai oblystaǵy 30-ǵa jýyq eldi mekenge baryp, bailanystyń sapasyn tekseredi.
«Nur Otan» partiiasy Túrkistan oblystyq máslihatyndaǵy fraktsiiasy internetpen qamtýmen qatar óńirdegi karerlerdi zańsyz paidalanýshylardan qorǵaý máselesin de baqylaýǵa alǵan bolatyn. Oblys aýmaǵynda keń taralǵan paidaly qazbalardy óndirýge jalpy 110 kelisimshart jáne 38 litsenziia berilgen. Oblystyq investitsiia jáne eksport basqarmasy zańsyz jer qoinaýyn paidalaný faktilerin boldyrmaý jáne aldyn-alý maqsatynda kelisimshart, litsenziia aýmaqtaryna zerdeleý jumystaryn júrgizgen. Nátijesinde, oblys aýmaǵynda jalpy kelisimshart mindettemelerin tolyq oryndamaǵany úshin 18 kelisimshart jáne 4 litsenziianyń kúshi merziminen buryn toqtatylǵan.
Oblystyq jáne aýdandyq máslihat depýtattary quzyrly ókilderimen birlesip, birneshe aýdan, qalada karerlerge monitoring júrgizdi. Ol jumystar jalǵasady. Anyqtalǵan quqyqbuzýshylyqtar boiynsha quqyq qorǵaý organdaryna usynys berilip, tiisti sheshimder qabyldanady.
