Túrkistan oblysynda «Aýyl amanaty» jobasy boiynsha aýyl sharýashylyǵy salasyna arnalǵan 2,5 paiyzdyq nesie berý bastaldy. Bul týraly óńirlik kommýnikatsiialar qyzmetinde ótken brifingte Túrkistan oblysynyń aýyl sharýashylyǵy basqarmasy basshysynyń orynbasary Nurbol Bekmuratov málim etti.
Onyń aitýynsha, «Aýyl amanaty» jobasyna oblystyń 16 aýdanynan 32 aýyldyq okrýginiń turǵyndary qatysa alady. Baǵdarlamany júzege asyrýǵa biyl oblys sharýalary úshin biýdjetten 20 mlrd. teńgege jýyq qarajat bólindi. Jalpy óńirimizden ortasha eseppen alǵanda 2500-den asa azamat baǵdarlamaǵa qatysa alady dep josparlanyp otyr.
– Atalǵan joba aýyldyq jerlerde jańa jumys oryndaryn qurýǵa, mal men qustyń sanyn kóbeitýge, shaǵyn kásipkerlikti ashý arqyly halyqtyń tabysyn arttyrýǵa jáne azyq-túlik qaýipsizdigin qamtamasyz etýge septigin tigizedi. Nesielendirý 6 baǵytta júzege asyrylady: ósimdik, mal, qus, balyq sharýashylyqtary men aýyl sharýashylyǵy kooperativterdi jabdyqtaý jáne turǵyndardyń óz kásibin ashýǵa múmkindigi bar, – dedi Nurbol Bekmuratov.
Sondai-aq, brifingte sóz alǵan «Túrkistan» áleýmettik kásipkerlik korporatsiiasy AQ Basqarma Tóraǵasynyń orynbasary Nurlybek Isaev nesie sharttarymen tanystyrdy.
– Bul baǵdarlama negizinen aýyl sharýshylyǵyn órkendetýge basymdyq beredi. Nesie alý úshin aýyl turǵyndary aýyl ákimdikterine ótinim bildirý qajet. Aýyl ákimdikteri turǵyndar nesie alǵansha tolyq súiemeldeý júrgizedi. Nesie alýshylar – aýyldyq eldimeken turǵyndary jáne zeinet jasynan aspaýy tiis. Kásipti ashýǵa oqytý jumystary tegin júrgiziledi. Ári nesiesin tolyq jaýyp, kásibin damytatyn bolsa, jeńildetilgen nesiege qaita qol jetkizýge bolady, - dedi Nurlybek Isaev.
Joba sheńberinde jeke qosalqy sharýashylyq pen jeke kásipkerler úshin 8 625 000 teńgege deiin, aýylsharýashylyq óndiristik kooperativteri úshin 27 600 000 teńgege deiin nesie beriledi. Mikrokredit merzimi – 5 jyl, mal sharýashylyǵy jobalaryna 7 jylǵa deiin beriledi. Jyljymaityn kez kelgen múliktiń 70 paiyzy baǵalanady. Nesieni óteýge beriletin jeńildik kezeńi – 12 aiǵa deiin.
Brifing barysynda jaýapty sala ókilderi nesie alýshy aýyl turǵyndarynyń aýyl sharýashylyǵy kooperativine birigýdiń paidasy kóp ekenin atap ótti. Sebebi bul arzan baǵamen jem satyp alýǵa, jer jyrtýǵa, qoqys shyǵarýǵa, arnaiy tehnikalardy paidalanýǵa múmkindik beredi.
Aita ketsek, «Aýyl amanaty» jobasy 2023-2025 jyldar aralyǵynda júzege asyrylady.
