مەملەكەت باسشىسى قاسىم-جومارت توقايەۆ اۋىلداردى دامىتۋ جونىندە ناقتى تاپسىرما بەرگەن بولاتىن. بۇل ورايدا، بيىل ەلىمىزدە حالىقتىڭ تابىسىن ارتتىرۋ باعدارلاماسىن ورىنداۋ ماقساتىندا «اۋىل اماناتى» جوباسى جۇزەگە اسىرىلا باستادى.

تۇركىستان وبلىسىندا «اۋىل اماناتى» جوباسى بويىنشا اۋىل شارۋاشىلىعى سالاسىنا ارنالعان 2،5 پايىزدىق نەسيە بەرۋ باستالدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە تۇركىستان وبلىسىنىڭ اۋىل شارۋاشىلىعى باسقارماسى باسشىسىنىڭ ورىنباسارى نۇربول بەكمۇراتوۆ ءمالىم ەتتى.

ونىڭ ايتۋىنشا، «اۋىل اماناتى» جوباسىنا وبلىستىڭ 16 اۋدانىنان 32 اۋىلدىق وكرۋگىنىڭ تۇرعىندارى قاتىسا الادى. باعدارلامانى جۇزەگە اسىرۋعا بيىل وبلىس شارۋالارى ءۇشىن بيۋدجەتتەن 20 ملرد. تەڭگەگە جۋىق قاراجات ءبولىندى. جالپى وڭىرىمىزدەن ورتاشا ەسەپپەن العاندا 2500-دەن اسا ازامات باعدارلاماعا قاتىسا الادى دەپ جوسپارلانىپ وتىر.

– اتالعان جوبا اۋىلدىق جەرلەردە جاڭا جۇمىس ورىندارىن قۇرۋعا، مال مەن قۇستىڭ سانىن كوبەيتۋگە، شاعىن كاسىپكەرلىكتى اشۋ ارقىلى حالىقتىڭ تابىسىن ارتتىرۋعا جانە ازىق-تۇلىك قاۋىپسىزدىگىن قامتاماسىز ەتۋگە سەپتىگىن تيگىزەدى. نەسيەلەندىرۋ 6 باعىتتا جۇزەگە اسىرىلادى: وسىمدىك، مال، قۇس، بالىق شارۋاشىلىقتارى مەن اۋىل شارۋاشىلىعى كووپەراتيۆتەردى جابدىقتاۋ جانە تۇرعىنداردىڭ ءوز كاسىبىن اشۋعا مۇمكىندىگى بار، – دەدى نۇربول بەكمۇراتوۆ.

سونداي-اق، بريفينگتە ءسوز العان «تۇركىستان» الەۋمەتتىك كاسىپكەرلىك كورپوراسياسى اق باسقارما ءتوراعاسىنىڭ ورىنباسارى نۇرلىبەك يسايەۆ نەسيە شارتتارىمەن تانىستىردى.

– بۇل باعدارلاما نەگىزىنەن اۋىل شارۋشىلىعىن وركەندەتۋگە باسىمدىق بەرەدى. نەسيە الۋ ءۇشىن اۋىل تۇرعىندارى اۋىل اكىمدىكتەرىنە ءوتىنىم ءبىلدىرۋ قاجەت. اۋىل اكىمدىكتەرى تۇرعىندار نەسيە العانشا تولىق سۇيەمەلدەۋ جۇرگىزەدى. نەسيە الۋشىلار – اۋىلدىق ەلدىمەكەن تۇرعىندارى جانە زەينەت جاسىنان اسپاۋى ءتيىس. كاسىپتى اشۋعا وقىتۋ جۇمىستارى تەگىن جۇرگىزىلەدى. ءارى نەسيەسىن تولىق جاۋىپ، كاسىبىن دامىتاتىن بولسا، جەڭىلدەتىلگەن نەسيەگە قايتا قول جەتكىزۋگە بولادى، - دەدى نۇرلىبەك يسايەۆ.

جوبا شەڭبەرىندە جەكە قوسالقى شارۋاشىلىق پەن جەكە كاسىپكەرلەر ءۇشىن 8 625 000 تەڭگەگە دەيىن، اۋىلشارۋاشىلىق وندىرىستىك كووپەراتيۆتەرى ءۇشىن 27 600 000 تەڭگەگە دەيىن نەسيە بەرىلەدى. ميكروكرەديت مەرزىمى – 5 جىل، مال شارۋاشىلىعى جوبالارىنا 7 جىلعا دەيىن بەرىلەدى. جىلجىمايتىن كەز كەلگەن مۇلىكتىڭ 70 پايىزى باعالانادى. نەسيەنى وتەۋگە بەرىلەتىن جەڭىلدىك كەزەڭى – 12 ايعا دەيىن.

بريفينگ بارىسىندا جاۋاپتى سالا وكىلدەرى نەسيە الۋشى اۋىل تۇرعىندارىنىڭ اۋىل شارۋاشىلىعى كووپەراتيۆىنە بىرىگۋدىڭ پايداسى كوپ ەكەنىن اتاپ ءوتتى. سەبەبى بۇل ارزان باعامەن جەم ساتىپ الۋعا، جەر جىرتۋعا، قوقىس شىعارۋعا، ارنايى تەحنيكالاردى پايدالانۋعا مۇمكىندىك بەرەدى.

ايتا كەتسەك، «اۋىل اماناتى» جوباسى 2023-2025 جىلدار ارالىعىندا جۇزەگە اسىرىلادى.