Túrkiia soty Izrail premer-ministri Biniamin Netaniahýdy halyqaralyq izdeýge jariialaý jóninde Interpolǵa suraý joldaý týraly qaýly shyǵardy. Bul sheshim Gaza sektoryna baǵyt alǵan Global Sumud gýmanitarlyq flotiliiasynyń ustalýyna bailanysty tergeý aiasynda qabyldandy, dep habarlaidy túrkiialyq Hürriyet Daily News basylymy.
Túrkiianyń 11-shi Joǵary qylmystyq soty prokýratýranyń ótinishin qanaǵattandyrǵan. Gýmanitarlyq missiiaǵa qatysýshylardyń arasynda Túrkiia azamattary da bolǵan.
Tergeý aiasynda Netaniahý men Izraildiń basqa da joǵary laýazymdy sheneýnikterine adamzatqa qarsy qylmys, genotsid, densaýlyqqa qasaqana ziian keltirý jáne azaptaý aiyptary taǵylyp otyr.
Aiyptaý qorytyndysynda múlikti joiý, asa aýyr tonaý, keme qatynasyna kedergi keltirý, kólik quraldaryn zańsyz basyp alý jáne adamdardy zańsyz bostandyǵynan aiyrý faktileri de kórsetilgen.
2025 jyldyń qarashasynda Túrkiia soty Gaza sektoryndaǵy oqiǵalar men Global Sumud flotiliiasyna qarsy áreketterge bailanysty Netaniahý jáne Izraildiń basqa da laýazymdy tulǵalaryn qamaýǵa alý týraly order bergen.
2026 jyldyń sáýirinde Túrkiia prokýratýrasy is boiynsha 35 adamǵa qatysty aiyptaý qorytyndysyn daiyndaýdy aiaqtady. Olardyń árqaisysyna aýyrlatatyn mán-jailar boiynsha ómir boiyna bas bostandyǵynan aiyrý, sondai-aq istiń basqa epizodtary úshin qosymsha uzaq merzimdi jaza taǵaiyndaý suralǵan.
Alaida Interpolǵa suraý joldanýy Netaniahýǵa qatysty birden "qyzyl habarlama" shyǵaryldy degendi bildirmeidi. Mundai habarlama uiymǵa múshe elderdiń quqyq qorǵaý organdaryna adamnyń ornalasqan jerin anyqtap, qajet bolǵan jaǵdaida ulttyq zańnamaǵa sáikes ony ýaqytsha ustaý týraly ótinish sanalady.
Interpoldyń "qyzyl habarlamasy" halyqaralyq qamaýǵa alý orderi bolyp eseptelmeidi.
