Qazaqstannyń tanymal týristik aimaqtary – Bozjyra, Kókjailaý, Katonqaraǵai men Marqakól tóńiregindegi pikirtalastar sońǵy jyldary jiilep ketti. Bir tarap iri týristik jobalardy óńir ekonomikasyn damytý múmkindigi dep baǵalasa, ekinshi tarap tabiǵatqa ziian kelýi múmkin dep alańdaidy, dep habarlaidy dalanews.kz.
«Kazahstanskaia pravda» gazetiniń sholýshysy Galina Vologodskaianyń pikirinshe, Katonqaraǵai aýdanynda sońǵy jyldary týrizm qarqyndy damyp keledi. Túrki mádenieti festivaline biyl rekordtyq 50 myń adam qatyssa, Marqakólde alǵash ret ótken etno jáne ekologiia festivaline 3 myńnan astam týrist kelgen. Bul kórsetkish Marqakól qoryǵynyń bir jylda qabyldaityn kelýshiler sanymen shamalas.
Avtordyń aitýynsha, týrister aǵynynyń kóbeiýi jergilikti kásipkerliktiń damýyna, qonaqúiler men qoǵamdyq tamaqtaný oryndarynyń jumysyna oń áser etip otyr. Sonymen qatar keibir azamattar tabiǵi aýmaqtardyń bastapqy qalpyn saqtaý qajettigin alǵa tartyp, infraqurylymdyq jobalarǵa qarsy pikir bildirýde.
Ol álemdik tájiribede týrizmniń damýy men tabiǵatty qorǵaýdy qatar alyp júrýge bolatynyn atap ótti. Onyń pikirinshe, ekologiialyq talaptardy saqtaý, sapaly servis pen zamanaýi tehnologiialardy qoldaný tabiǵi aýmaqtardy saqtaýǵa múmkindik beredi.
Sondai-aq avtor Shyǵys Qazaqstandaǵy joldardyń jańartylyp, jańa áýejailardyń salynyp jatqanyn eske saldy. Onyń aitýynsha, bul óńirde jyl boiy jumys isteitin týristik keshenderdi damytýǵa jol ashady.
Sholýshynyń pikirinshe, Katonqaraǵai, Marqakól, Ridder jáne Altai sekildi shalǵai óńirler úshin týrizm – ekonomikalyq damýdyń jáne halyqtyń turaqtap qalýynyń mańyzdy tetigi. Sondyqtan bul baǵyttaǵy jobalar tabiǵatty saqtaý talaptaryn eskere otyryp júzege asyrylýy tiis.
