Túrkistan qalasyndaǵy Q.A.Iasaýı atyndaǵy HQTÝ-ń klınıko-dıagnostıkalyq ortalyǵyna Túrkıadan bilikti dárigerler kelip, medısına salasyndaǵy ozyq tájirıbelerimen bólisti. Sondaı-aq, Túrkistan oblysy turǵyndaryna birneshe kúrdeli aqysyz otalar jasady, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Bunyń barlyǵy «Ana jurttan ata jurtqa densaýlyq kópiri» jobasy aıasynda baýyrlas elge degen syı retinde júzege asýda. Bul jaıynda Q.A.Iasaýı atyndaǵy Halyqaralyq qazaq-túrik ýnıversıtetiniń Ókiletti keńes tóraǵasy, profesor, doktor Mýhıddın Shimshek málimdedi.

Dárigerler 1-10 maýsym aralyǵynda Q.A.Iasaýı atyndaǵy HQTÝ klınıka-dıagnostıkalyq ortalyǵyna tirkelgen týa bitken damý aqaýlary bar balalardy kezeksiz tekseristen ótkizdi.

Túrkıalyq pedıatr-dárigerler búldirshinderdi qabyldap, ata-analarǵa kásibı keńesterin berip, arnaıy emdeý tásilderimen bólisti. Sondaı-aq, serebraldy sal aýrýy, daýna sındromy, aýtızm, tirek-qımyl júıesi, estý, kórý, sóıleý qabileti buzylǵan balalardy dárigerlik tekseristen ótkizdi.

Jalpy sany 40-tan astam bala joǵary deńgeıli mamandardyń qabyldaýynda boldy. Sondaı-aq, otolarıngolog-dárigerler qulaqtyń irińdi aýrýlary jáne muryn isikteri dıagnozdarymen 32 naýqasqa kúrdeli otalar jasap, 3 naýqasqa qulaq protezderin salǵan.