Qańtardaǵy tártipsizdikter kezindegi lańkester týraly suraqqa jaýap bergen Bas prokýror sol kúnderi túrli aqparat túskenin, sol aqparattardyń ishinde terrorıster sany 20 myńǵa jýyq ekeni aıtylǵanyn atap ótti.
"Quqyq buzýshylardyń áreketinen ol kúnderi bul shynymen de solaı bolyp kórindi, sonyń ishinde halyqtan da sheteldik qylmyskerler týraly, arasynda qyrǵyz, ózbek tilderinde sóıleıtinder bar degen aqparat tústi. Shabýyl jasaýshylardyń barlyǵy qoǵamǵa terrorıst bolyp sezildi...", - dedi Berik Asylov.
Onyń aıtýynsha, qańtardaǵy tártipsizdikter kezinde kim terrorıst, kim terrorıst emes ekenin anyqtaý qıynǵa soqqan.
"Sizderge aıtarym, lańkestik áreket jasaǵan adamdardyń bári lańkes bolyp sanalady. Onyń saqal qoıyp nemese avtomatpen júgirýi shart emes. Birden aıtamyn, terrorıster resmı túrde terrorıst ekenin málimdegen joq. Olardyń qıratqan, órtegen, ákimdikti basyp alǵan barlyq áreketin biz lańkestik áreket dep sanaımyz jáne olardy terrorıster dep esepteımiz", - dedi Berik Asylov.
2022 jylǵy 9 qańtarda Qazaqstan Respýblıkasynyń burynǵy İshki ister mınıstriniń mindetin atqarýshy Erlan Turǵymbaev qańtardaǵy tártipsizdikter kezinde Almatyǵa 20 myńǵa jýyq lańkes kelgenin habarlady.
